Apple zbulon planet për eventin e 9 shtatorit, ku iPhone Ultra i palosshëm pritet të marrë vëmendjen kryesore

Apple ka planifikuar për 9 shtatorin eventin e saj të madh “Surprise and Shine”, një prezantim që pritet të sjellë disa prej produkteve dhe teknologjive më të rëndësishme të kompanisë në vitet e fundit.

Qendra e vëmendjes mund të jetë iPhone Ultra, modeli i parë i palosshëm i Apple. Krahas tij, kompania pritet të prezantojë edhe iPhone 18 Pro, iPhone 18 Pro Max, gjeneratën e ardhshme të Apple Watch, AirPods 5 dhe një HomePod Mini të përditësuar.

Ky event pritet të shënojë gjithashtu një moment të veçantë në drejtimin e kompanisë, pasi do të jetë prezantimi i parë i madh nën udhëheqjen e CEO-së së ri John Ternus. Ai e mori detyrën nga Tim Cook vetëm një javë më parë.

Produkti që ka ngjallur më shumë interes është iPhone Ultra, i cili do të përfaqësonte hyrjen e Apple në tregun e telefonave të palosshëm.

Ndërsa kompani si Samsung dhe Google kanë hedhur prej kohësh në treg disa gjenerata pajisjesh të tilla, Apple po i bashkohet këtij segmenti me vonesë.

Për këtë arsye, pritshmëritë janë të larta dhe përdoruesit presin që kompania të ofrojë një pajisje që justifikon vitet e gjata të pritjes.

Rebecca Crook, CEO e MSQDX, e ka përshkruar eventin e 9 shtatorit si një prej prezantimeve më të rëndësishme të Apple në vitet e fundit.

Sipas saj, rëndësia e tij lidhet me dy zhvillime: debutimin e mundshëm të iPhone-it të parë të palosshëm dhe faktin që Tim Cook nuk do të jetë më personi që prezanton produktet kryesore të kompanisë, për herë të parë pas më shumë se një dekade.

Modelet iPhone 18 Pro dhe iPhone 18 Pro Max nuk pritet të sjellin një ndryshim aq të thellë sa iPhone Ultra, por raportimet flasin për disa përmirësime të rëndësishme.

Një prej tyre mund të jetë vendosja e sensorit Face ID poshtë ekranit.

Nëse kjo teknologji konfirmohet, Apple mund të heqë ose të zvogëlojë ndjeshëm elementin e zi në pjesën e sipërme të ekranit, i cili prej vitesh është pjesë e pamjes së iPhone-it.

Ndryshime të rëndësishme priten edhe në sistemin fotografik të pajisjes.

Sipas raportimeve, kompania mund të prezantojë përmirësimin më të madh të harduerit të kamerës në vitet e fundit.

Një ndër veçoritë e përfolura për iPhone 18 Pro është kamera telefoto me aperturë të ndryshueshme.

Kjo zgjidhje do t’i jepte përdoruesit mundësinë të rregullonte në mënyrë mekanike sasinë e dritës që futet në objektiv.

Apertura e ndryshueshme përdoret zakonisht në kamerat profesionale dhe mund të ndikojë ndjeshëm në cilësinë e fotografive, si në ambientet me shumë pak dritë, ashtu edhe në ato me ndriçim të fortë.

Modelet Pro pritet të pajisen edhe me procesorë më të fuqishëm, të ndërtuar për të përballuar detyra më të avancuara të inteligjencës artificiale.

Ben Wood nga CCS Insight vlerëson se Apple do t’i japë një rol të madh “Apple Intelligence”, funksioneve të reja të Siri-t dhe përditësimeve të tjera softuerike.

Megjithatë, ai parashikon se pjesa më e madhe e interesit do të përqendrohet te pajisjet dhe përmirësimet harduerike.

Apple pritet të sjellë në skenë edhe AirPods 5, së bashku me një variant AirPods 5 që do të ketë anulim aktiv të zhurmës.

Megjithatë, risitë mund të jenë më të kufizuara se sa u përfol më herët.

Një version eksperimental i softuerit për Mac kishte shfaqur pamje të një modeli të papublikuar AirPods me kamera të integruara.

Sipas idesë së testuar, kufjet do të përdornin “Visual Intelligence” për të analizuar hapësirën përreth dhe për t’i dhënë më shumë informacion Siri-t dhe mjeteve të tjera të AI-së.

Ky koncept u prit në mënyra të ndryshme. Disa përdorues e konsideruan një risi, ndërsa të tjerë shprehën shqetësime lidhur me privatësinë.

Megjithatë, raportimet e Mark Gurman bëjnë të ditur se AirPods me kamera nuk pritet të dalin në treg përpara vitit 2027.

Për këtë arsye, AirPods 5 pritet të përqendrohen te cilësia e zërit, jetëgjatësia e baterisë dhe, ndoshta, funksione të reja që lidhen me shëndetin.

Lista e pajisjeve të pritshme përfshin edhe Apple Watch Series 12 dhe Apple Watch Ultra 4.

Apple Watch Series 12 mund të vijë me një procesor të përmirësuar, kohëzgjatje më të madhe të baterisë dhe konsum më efikas të energjisë.

Një rikthim i mundshëm i variantit premium me kasë qeramike përmendet si një prej ndryshimeve më të dukshme, së bashku me rripa dhe ngjyra të reja.

Ndërkohë, Apple Watch Ultra 4 mund të pajiset me sensorë më të avancuar, të cilët do të rrisnin saktësinë e matjeve shëndetësore dhe do të ulnin konsumin e energjisë.

Raportimet përmendin gjithashtu një sistem që do të paralajmëronte përdoruesin për tensionin e gjakut.

Megjithatë, funksioni i shumëpritur për monitorimin e nivelit të sheqerit në gjak nuk pritet të jetë ende gati.

Inteligjenca artificiale dhe versioni i ardhshëm i Siri-t pritet të zënë një hapësirë të rëndësishme në prezantim.

Në këtë kuadër, një HomePod Mini i ri do të ishte një pajisje e përshtatshme për të demonstruar këto aftësi.

Kanë kaluar rreth gjashtë vjet që nga prezantimi i modelit aktual të HomePod Mini.

Një HomePod Mini 2, i pajisur me çip më të fuqishëm dhe me mbështetje për përpunimin e funksioneve të inteligjencës artificiale, mund ta kthente altoparlantin në një asistent shtëpiak dukshëm më të avancuar.

Në versionet e fundit testuese të macOS është gjetur kodi “B525”. HomePod Mini aktual përdor kodin “B520”, çka ka shtuar dyshimet se gjenerata e dytë mund të jetë pranë prezantimit.

Përdoruesit që presin një iPhone 18 standard dhe më të përballueshëm mund të duhet të presin më gjatë.

Apple pritet të vendosë fillimisht në qendër modelet premium, ndërsa prezantimin e versionit standard, jo-Pro, ta shtyjë deri në vitin e ardhshëm.

Kjo do ta orientonte eventin e shtatorit kryesisht drejt pajisjeve më të shtrenjta dhe teknologjive të reja.

“Surprise and Shine” do të zhvillohet më 9 shtator, në orën 10:00 sipas kohës lokale në Cupertino, në Steve Jobs Theater në Apple Park.

Në sallë do të marrin pjesë gazetarë dhe të ftuar të përzgjedhur nga Apple.

Ndërsa publiku do të mund ta ndjekë drejtpërdrejt përmes faqes “Apple Events” dhe kanalit zyrtar të kompanisë në YouTube.

Me debutimin e mundshëm të iPhone-it të palosshëm, modelet e reja Pro dhe produkte të përditësuara në pothuajse të gjithë ekosistemin e saj, Apple pritet ta shndërrojë eventin e 9 shtatorit në një prej prezantimeve më të rëndësishme të viteve të fundit. /GazetaExpress/