Android 17 zgjeron personalizimin e ndërfaqes dhe forcon mbrojtjen nga mashtrimet

Përditësimi QPR2 Beta 3 për pajisjet Pixel tregon se Google po i zgjeron ndjeshëm mundësitë e personalizimit në Android 17. Krahas rregullimit të gabimeve, ky version sjell edhe disa veçori të reja që pritet të përfshihen në variantin përfundimtar.

Risia që bie më shumë në sy është ridizajnimi i panelit të Cilësimeve të Shpejta, i cili tashmë mund të organizohet në mënyrë më të detajuar sipas zgjedhjeve të përdoruesit.

Android 17 përfshin një redaktues të ri për konfigurimin e këtij paneli. Përmes tij, përdoruesit mund të zgjedhin se cilët butona do të paraqiten në përmasa më të mëdha, t’ua ndryshojnë vendndodhjen dhe ta përshtatin renditjen me mënyrën se si e përdorin telefonin.

Fleksibiliteti i ri nuk përfshin vetëm butonat. Google po mundëson edhe zhvendosjen e rrëshqitësit të ndriçimit dhe të media player-it, duke ofruar kontroll më të madh si mbi pamjen, ashtu edhe mbi funksionimin e panelit.

Më shumë mundësi priten edhe në aspektin vizual të versionit final të Android 17. Një prej tyre është rregullimi me anë të një rrëshqitësi i nuancave të katër ngjyrave kryesore të ndërfaqes, çka sjell një nivel më të imët personalizimi krahasuar me versionet e mëparshme.

Ndërfaqja pritet të pasurohet gjithashtu me efekte të reja turbullimi, të krijuara për t’i dhënë asaj një paraqitje më bashkëkohore dhe më dinamike.

Megjithatë, përditësimi nuk kufizohet vetëm te dizajni. Google po shton masa të reja sigurie për t’i mbrojtur përdoruesit nga mashtrimet e inxhinierisë sociale që realizohen përmes telefonatave.

Kur një përdorues tenton të aktivizojë funksione të tilla si ridrejtimi i thirrjeve, sistemi do të kërkojë hapa të tjerë dhe do të paraqesë mesazhe shtesë konfirmimi.

Kjo masë synon të frenojë rastet kur mashtruesit i bindin viktimat të aktivizojnë veçori të caktuara pa qenë plotësisht të vetëdijshme për veprimin që po kryejnë.

Në tërësi, ndryshimet e Android 17 përqendrohen në dy drejtime kryesore: zgjerimin e lirisë për personalizimin e ndërfaqes dhe shtimin e mekanizmave të sigurisë për përdoruesit. /GazetaExpress/