Zyrtare: Chelsea transferon Maxence Lacroix

Maxence Lacroix është zyrtarisht futbollist i Chelseat. Qendërmbrojtësi francez është transferuar nga Crystal Palace dhe ka firmosur një marrëveshje afatgjatë, të vlefshme deri në vitin 2032.

Klubi nga Londra ka bërë publik afrimin e 26-vjeçarit, ndërsa shuma e operacionit raportohet të jetë 60 milionë euro.

Në njoftimin zyrtar, Chelsea deklaroi se ka kënaqësinë të konfirmojë nënshkrimin e Maxence Lacroix nga Crystal Palace. Mbrojtësi ka pranuar një kontratë në Stamford Bridge deri në vitin 2032 dhe do të bashkohet me shokët e rinj të skuadrës përpara fillimit të sezonit 2026/27.

Pas zyrtarizimit, francezi shprehu gëzimin për kalimin te klubi që drejtohet nga Xabi Alonso, duke bërë të qarta edhe synimet e tij për këtë aventurë.

“Jam vërtet i lumtur që jam pjesë e këtij klubi të bukur… Ambicia është të ngremë trofe dhe mezi pres të kontribuoj”, deklaroi Lacroix, i cili vlerësoi gjithashtu përshtatjen e tij me vizionin e trajnerit.

Lacroix mbërrin te Chelsea me vlerësimin e njërit prej mbrojtësve më autoritarë në Evropë. Gjatë dy sezoneve me Crystal Palace, ai regjistroi 98 paraqitje dhe ishte pjesë e sukseseve në Ligën e Konferencës, Kupën FA dhe Community Shield.

I formuar në akademinë e Sochaux, mbrojtësi kaloi katër vite te Wolfsburg përpara transferimit në Selhurst Park. Në mars ai zhvilloi ndeshjen e parë me Francën, ndërsa u aktivizua tri herë në Kupën e Botës, ku përfaqësuesja franceze e mbylli këtë vit në vendin e katërt.