Zhegrova dhe Openda prezantohen te Juventusi: Një ëndërr që u bë realitet

Në ditën e fundit të merkatos, Juventusi ka sjellë dy përforcime të rëndësishme: Edon Zhegrova dhe Lois Openda. Sot, të dy futbollistët u prezantuan përpara tifozëve bardhezinj, duke ndarë emocionet e para si lojtarë të “Zonjës së Vjetër”.

Zhegrova, i ardhur pas një periudhe të vështirë për shkak të një operacioni që e mbajti jashtë fushës që nga dhjetori, foli me entuziazëm për këtë hap të madh në karrierë:

“Ditët e para kanë qenë fantastike, përshtypjet e mia janë shumë pozitive. Juventusi dhe projekti më bindën menjëherë, sepse gjithmonë kam ëndërruar të luaj për një klub kaq të madh.

Takimi i parë me Comolli-n dhe Chiellini-n për mua ishte si një ëndërr që u bë realitet. Po ndihem gjithnjë e më mirë, stafi po më ndihmon shumë dhe shumë shpejt do të jem gati për të dhënë kontributin tim”.

Krahas tij, sulmuesi belg Lois Openda, i transferuar nga Leipzig, bëri të qartë rolin e tij në skuadër:

“Pozicioni im më i mirë është si numër nëntë, edhe pse më pëlqen të lëviz në të gjithë fushën.

Më bindi madhështia e Juventusit, një klub ku kanë luajtur kampionë të mëdhenj si Ibrahimovic, që për mua janë burim frymëzimi”.

Openda nuk la pa përmendur as episodin e vitit të kaluar me mbrojtësin Gleison Bremer, i cili u dëmtua pas një dyluftimi me të:

“Atëherë i kërkova falje dhe i dërgova mesazhe. Tani do të kemi kohë të flasim edhe më gjatë. Bremer është një lojtar i madh dhe mbi të gjitha një njeri i madh”, – theksoi sulmuesi belg.

Me entuziazmin e Zhegrovës dhe vendosmërinë e Opendës, Juventusi i Massimiliano Allegrit duket i gatshëm të nisë një kapitull të ri, duke synuar që rikthimi në majat e futbollit italian dhe europian të bëhet realitet.