Zbulohet pse Interi do të veshë fanellën e tretë në finalen e Ligës së Kampionëve kundër PSG-së

Ekziston një arsye specifike pas vendimit të Interit për të veshur fanellën e tretë në finalen e ardhshme të Ligës së Kampionëve kundër PSG-së—diçka që ka ndodhur vetëm dy herë gjatë këtij sezoni europian.

Pasi janë të listuar si skuadër mysafire, për shkak të pozicionit në anën e djathtë të shortit, Nerazzurrët nuk u lejuan të vishnin fanellën tradicionale zi e blu në Mynih, pasi ajo do të përplasej me fanellën e parë të PSG-së.

Si rrjedhojë, Interi u detyrua të zgjedhë mes fanellës së dytë dhe asaj të tretë—një vendim që, sipas “La Gazzetta dello Sport”, u mor në mënyrë unanime nga vetë lojtarët, të cilët vendosën për fanellën e verdhë.

Kjo zgjedhje mund të jetë ndikuar edhe nga besëtytnia: humbja e vetme e Interit në këtë sezon të Ligës së Kampionëve ka ardhur kur mbante fanellën e bardhë, në ndeshjen kundër Bayer Leverkusen si mysafir.

Në të kundërt, ata kanë fituar të dyja ndeshjet kur kanë përdorur fanellën e tretë, përballë Sparta Pragës dhe Feyenoordit.

Në gjashtë finalet e mëparshme të Kupës së Kampionëve/Ligës së Kampionëve, Interi gjithmonë ka luajtur me fanellën bazë ose atë si mysafir.

Megjithatë, fitorja e fundit në Kupën UEFA në vitin 1998 erdhi pikërisht me fanellën e tretë, duke mposhtur Lazion 3-0 në Paris, me një fanellë që u përdor gjatë gjithë atij turneu.