Zbritje rekord pikësh mund ta presë Manchester Cityn pas vendimit për 114 shkelje

Një komision i pavarur e shpalli Manchester Cityn fajtor për shkeljen e 114 rregullave të Ligës Premier muajin e kaluar, dhe klubi mund të përballet me një zbritje të madhe pikësh.

Raportimet pretendojnë se, gjatë viteve 2009–2018, City përdori marrëveshje sponsorizimi fiktive për të rritur të ardhurat me rreth 1.045 miliardë euro. Në atë periudhë, skuadra fitoi tre tituj të Ligës Premier.

Gjatë procesit, i cili zgjati tre vjet e gjysmë, klubi anglez ka mohuar vazhdimisht akuzat, duke thënë se disponon prova “të pakundërshtueshme” për të mbështetur mbrojtjen. Nëse vendimi për fajësi konfirmohet, dënimi mund të caktohet deri më 8 shkurt.

Ndëshkimet e mundshme përfshijnë gjoba, ndalim të transferimeve, zbritje pikësh, përjashtim nga liga dhe anulim të titujve të fituar. Ndërhyrja e Rregullatorit të Pavarur të Futbollit mund të çojë gjithashtu në largimin e pronarëve nga drejtimi i klubit.

City është i vendosur të përdorë “çdo rrugë ligjore” për të shmangur masat ndëshkuese, ndërsa Liga Premier synon që ato të zbatohen përpara përfundimit të sezonit 2026/27.

Është propozuar që pikët t’i zbriten klubit përgjatë disa sezoneve radhazi. Megjithatë, burime nga Federata Angleze e Futbollit (FA) dhe Liga Premier vlerësojnë se ka më shumë gjasa që zbritja të bëhet brenda një sezoni, duke i lënë Cityt mundësinë të luftojë për qëndrimin në elitë.

Burime të Football Insider bëjnë të ditur se po shihet gjithnjë e më shumë si mundësi zbritja e 40 deri në 50 pikëve në vetëm një sezon.

Sipas të njëjtit raportim, pritet që krahas kësaj mase, Manchester City të marrë edhe një ndalim të zgjatur të transferimeve dhe një gjobë jashtëzakonisht të lartë.

Pasi të publikohet vendimi, klubi do të mund t’i apelojë sanksionet. Nëse konsideron se gjatë procesit ka pasur parregullsi, City mund të kërkojë arbitrazh dhe më pas ta çojë çështjen në Gjykatën e Lartë.

Nëse Liga Premier i heq Cityt 50 pikë brenda një sezoni, kjo do të përbënte zbritjen më të madhe të pikëve në historinë e futbollit anglez.

Rekordi aktual i përket Luton Town, të cilit iu zbritën 30 pikë në sezonin 2008/09, pasi në edicionin pararendës kishte rënë nga League One.