Yamal lë pas Raulin dhe vendos një rekord të paarritur prej 66 vitesh

Lamine Yamal vijon të lërë gjurmë në historinë e futbollit. Sulmuesi i Barcelonës ishte sërish protagonist me kombëtaren e Spanjës, duke vendosur rekorde të reja dhe duke dëshmuar edhe një herë se është ndër talentet më të mëdha të futbollit evropian.

Spanja triumfoi 4-1 ndaj Kroacisë të martën në mbrëmje, në stadiumin “Ramon Sanchez Pizjuan”, në ndeshjen e dytë të Grupit 3 të Ligës A në Ligën e Kombeve. Yamal shënoi dy prej golave dhe dha edhe një asistim.

Të dhënat e publikuara nga Stats du Foot tregojnë se kjo ishte ndeshja e parë në karrierën e tij me Spanjën në të cilën ai realizoi gol dhe asistoi.

Ndërkaq, sipas Mister Chip, 19-vjeçari u bë lojtari më i ri spanjoll që arrin të shënojë të paktën dy herë dhe të japë një asistim në të njëjtën ndeshje. Yamal e realizoi këtë në moshën 19 vjeç e 78 ditë.

Rekordi i mëparshëm mbahej nga Raul, i cili e kishte arritur këtë statistikë kur ishte 21 vjeç e 273 ditë.

Një tjetër arritje e rëndësishme lidhet me golin e tij të dhjetë për kombëtaren A. Sipas Stats du Foot, Yamal është lojtari më i ri evropian që mbërrin në këtë kuotë që prej danezit Harald Nielsen, i cili shënoi golin e dhjetë më 26 gusht 1960, në moshën 18 vjeç e 10 muaj.

Paraqitjet e tij mbresëlënëse nuk kufizohen vetëm te rekordet. Sipas të njëjtit burim francez, Yamal ka qenë drejtpërdrejt i përfshirë në 18 gola në tetë ndeshjet e fundit me klubin dhe kombëtaren, ku numëron 11 gola dhe shtatë asistime.

Ylli i Barcelonës kryeson gjithashtu listën e futbollistëve me më shumë kontribute në gola në Ligën e Kombeve deri në këtë fazë, pasi ka marrë pjesë drejtpërdrejt në katër gola.