Vushtrria reagon pas bojkotit të lojtarëve: “Klubi nuk shantazhohet nga askush

FC Vushtrria ka shprehur pakënaqësinë e saj pas bojkotit të një grupi lojtarësh, të cilët, sipas klubit, nuk u paraqitën në ndeshjen e sotme, pavarësisht zotimeve të bëra gjatë takimit të zhvilluar një natë më parë.

Bordi ka pranuar se paga e fundit e futbollistëve të ekipit të parë është vonuar 20 ditë. Sipas tij, kjo situatë është krijuar për shkak të procedurave ligjore që lidhen me sigurimin e dokumentacionit të sponsorizimit, ndërsa lojtarëve u është premtuar se pagesat do të kryhen gjatë javës së ardhshme.

Në takimin e mbrëmshëm, ku morën pjesë edhe përfaqësues të tifogrupit “Forca”, lojtarët u informuan se pagat do të ekzekutohen gjatë javës së ardhshme. Po ashtu, përfaqësuesve të “Forcës” iu premtua shlyerja e një detyrimi që lidhet me organizimin e tyre të brendshëm.

Megjithatë, këto zotime nuk mjaftuan që futbollistët të paraqiteshin në ndeshjen e sotme. Për pasojë, klubi thotë se është gjendur në një situatë të vështirë dhe se ekziston rreziku që ndeshjen ta humbasë në tavolinë.

Bordi ka bërë të ditur se vonesa e pagës së fundit është e para e këtij lloji që nga hyrja e FC Vushtrrisë në Superligë. Ai ka marrë përgjegjësinë për situatën, duke sqaruar se dokumentacioni përkatës i sponsorizimit është kompletuar gjatë kësaj jave.

FC Vushtrria thekson se ka qenë ndër klubet me më së paku vonesa në përmbushjen e detyrimeve ndaj lojtarëve. Megjithatë, drejtuesit pranojnë se pagesat duhet të kryhen në kohë dhe thonë se po punojnë për të shmangur përsëritjen e rasteve të tilla.

Klubi e konsideron përfundimin e dokumentacionit të sponsorizimit një hap të rëndësishëm për të ardhmen e tij. Me mbështetjen e bizneseve më të fuqishme të qytetit, drejtuesit besojnë se do të sigurohen kushte më të qëndrueshme për funksionimin dhe zhvillimin e FC Vushtrrisë.

Bojkoti i ndeshjes së sotme dhe pasojat që mund të rrjedhin prej tij, sipas klubit, janë shqetësuese. Bordi ka paralajmëruar se çështja do të shqyrtohet me seriozitet, në përputhje me rregulloret e brendshme dhe legjislacionin në fuqi, duke vlerësuar përgjegjësitë dhe rrethanat e krijuara.

FC Vushtrria ka insistuar se interesat e klubit qëndrojnë mbi ato individuale. Drejtuesit kanë kërkuar që çështjet e brendshme të zgjidhen përmes komunikimit, mirëkuptimit dhe përgjegjësisë së përbashkët, pa e dëmtuar klubin.

“FC Vushtrria është mbi interesat individuale”, thuhet në reagim, ndërsa mesazhi përmbyllës i klubit është i qartë: “Klubi nuk shantazhohet nga askush”.

Klubi ka deklaruar gjithashtu se mbetet i përkushtuar ndaj organizimit dhe zhvillimit të tij, me bindjen se këto vështirësi do të tejkalohen dhe se FC Vushtrria do të rikthehet edhe më e fortë.