Vllaznia zyrtarizon Dario Ievën, italiani merr rolin e përgatitësit atletik te kuqeblutë

Vllaznia ka bërë të ditur vetëm pak minuta më parë në rrjetet sociale afrimin e Dario Ievës në stafin teknik. Specialisti italian do të ushtrojë detyrën e përgatitësit atletik, ndërsa vjen me formim në “Shkencat Sportive” dhe me licencat “UEFA C” dhe “UEFA Fitness”, çka pasqyron nivelin e tij profesional.

“Mirë se erdhe, Dario Ieva!

KF Vllaznia ka kënaqësinë të prezantojë pjesëtarin më të ri të stafit teknik, Dario Ieva, i cili do të marrë detyrën e Përgatitësit Atletik të ekipit tonë për sezonin e ri.

I diplomuar në Shkencat Sportive dhe i pajisur me licencat UEFA C dhe UEFA Fitness B, Dario sjell me vete eksperiencë të rëndësishme në futbollin italian dhe atë shqiptar.

Me njohuritë e tij në përgatitjen fizike, analizën e të dhënave sportive, rehabilitimin e dëmtimeve dhe teknologjinë GPS, jemi të bindur se do të japë një kontribut të rëndësishëm në rritjen e performancës së ekipit.

I urojmë Darios suksese dhe mirëseardhje në familjen kuqeblu”, ka shkruar klubi i Vllaznisë.

Me këtë lëvizje, skuadra kuqeblu vijon t’i kushtojë vëmendje çdo detaji, duke synuar rritjen e nivelit profesional brenda ekipit. Objektivi madhor mbetet pjesëmarrja historike në grupet e Conference League, pa lënë mënjanë edhe rikthimin te titulli në Superiore.