Vllaznia përballet me Partizanin pa Edi Martinin, ndërsa “Loro Boriçi” kërkohet të ndizet nga mbështetja shkodrane

Vllaznia dhe Partizani do të matin forcat sonte në stadiumin “Loro Boriçi”, në duelin e vlefshëm për javën e tretë të “Abissnet Superiore”. Ndeshja është programuar të nisë në orën 18:30.

Skuadra shkodrane do të jetë pa trajnerin Edi Martini në pankinë, pasi ai është pezulluar nga Disiplina për gjestin e bërë në Elbasan. Përballë saj do të jetë një Partizan me motivim të shtuar, që në dy javët e para të kampionatit ka grumbulluar vetëm një pikë dhe synon të thyejë një tabu në Shkodër, ku nuk fiton që prej vitit 2022.

Pak orë para startit të sfidës, Vllaznia u është drejtuar tifozëve përmes një mesazhi, duke kërkuar praninë dhe përkrahjen e tyre të plotë gjatë gjithë takimit.

“Le të tregojmë edhe njëherë forcën e Shkodrës, dashurinë për Vllazninë dhe qytetarinë që na karakterizon. Të mbështesim ekipin që nga minuta e parë e deri në të fundit, me zë, me zemër dhe me respekt”, thuhet në postimin e klubit, i cili e mbyll mesazhin me sloganin: Sot, “Loro Boriçi” duhet të flasë kuqeblu!

Takimi pritet të jetë i luftuar, pasi përballë do të jenë dy ekipe që kërkojnë të përmirësojnë bilancin e tyre dhe të fitojnë terren në renditje. Tri pikët do të kishin peshë të veçantë për vazhdimësinë e kampionatit dhe për garën me rivalët e titullit.