Vinicius tregon bisedën e parë me Mourinhon dhe porosinë që mori prej tij

Vinicius Junior ka rrëfyer për herë të parë si ka nisur puna me Jose Mourinhon, ndërsa bëri të ditur se tekniku portugez i ka kërkuar të mos ndryshojë stilin e lojës që e ka dalluar gjithmonë.

Braziliani u rikthye në Valdebebas gjatë javës së katërt të përgatitjeve të Real Madridit për sezonin e ri, një zhvillim që mori vëmendje të madhe. Sulmuesi pati takimin e parë me Mourinhon dhe mes tyre duket se u krijua menjëherë një marrëdhënie e mirë.

Duke folur për Real Madrid TV, Vinicius tregoi përshtypjet nga ditët e para të punës me trajnerin e ri, si dhe për atmosferën brenda ekipit.

“Gjithçka ka shkuar shumë mirë që prej rikthimit. Po njihem me trajnerin dhe lojtarët e rinj, ndërkohë që po punojmë me intensitet të lartë. Mourinho më ka kërkuar të vazhdoj të jem ai që kam qenë gjithmonë: i lumtur, pozitiv dhe të luaj futbollin tim”, u shpreh Vinicius.

Ylli i Real Madridit nënvizoi gjithashtu peshën që ka faza përgatitore, duke shpjeguar se synimi kryesor i skuadrës është arritja e nivelit më të mirë të mundshëm fizik.

“Është e nevojshme të përgatitemi mirë fizikisht, në mënyrë që gjatë sezonit të kemi sa më pak lëndime dhe të gjithë futbollistët të jenë të gatshëm”, shtoi braziliani.

Sipas Viniciusit, puna gjatë kësaj periudhe po zhvillohet me ritëm tepër të lartë, madje me nga dy seanca stërvitore brenda ditës.

“Dje u stërvitëm dy herë, ndërsa sot zhvilluam një seancë. Ky është ritmi me të cilin po ecim. Sot punuam në palestër dhe kryem ushtrime të shkurtra, me më shumë ngarkesë për këmbët”, tregoi ai.

“Seanca ishte e mirë dhe në fund të gjithë ishim shumë të lodhur. Tani duhet të pushojmë për t’u përgatitur për nesër. Kjo është faza përgatitore dhe ne duhet të jemi gati”, përfundoi Vinicius.