Vinicius synon marrëveshje historike me Real Madridin, klubi shqyrton dy alternativa

Bisedimet për rinovimin e Vinicius Junior me Real Madridin kanë mbetur në vend, pasi mes pretendimeve financiare të brazilianit dhe propozimit të klubit ekziston një diferencë e konsiderueshme. Sulmuesi kërkon një kontratë që do të konsiderohej “historike”.

Gazetari Mario Cortegana, gjatë një prononcimi në kanalin e Inaki Angulos në YouTube, bëri të ditur se drejtuesit madrilenë i shohin kërkesat e lojtarit si të vështira për t’u plotësuar. Sipas tij, hapësira e Real Madridit për të ndryshuar ofertën është e kufizuar.

Palët nuk kanë lëvizur nga qëndrimet e tyre, ndaj finalizimi i marrëveshjes pritet të kërkojë lëshime si nga Vinicius, ashtu edhe nga klubi.

Braziliani ndodhet në vitin e fundit të kontratës me “Los Blancos”. Për këtë arsye, Real Madridi po përballet me presion në rritje për ta zgjidhur çështjen përpara janarit, muaj kur sulmuesi fiton të drejtën të negociojë me klube të huaja për një transferim të mundshëm.

Vinicius synon të përfitojë mes 20 dhe 30 milionë euro neto për sezon, ndërkohë që paga e tij aktuale është rreth 18 milionë euro neto në vit. Hendeku mes kërkesës së lojtarit dhe ofertës së Real Madridit konsiderohet një prej shkaqeve kryesore që rinovimi ende nuk është përmbyllur.

Nëse negociatat nuk prodhojnë një marrëveshje të re, raportimet tregojnë se Real Madridi është i gatshëm të marrë në konsideratë shitjen e Viniciusit gjatë kësaj vere. Klubi kërkon të shmangë mundësinë që braziliani të largohet pa kompensim financiar pas përfundimit të kontratës.

Pavarësisht ngërçit, dëshira e sulmuesit vazhdon të jetë qëndrimi në “Santiago Bernabeu”. Vinicius e sheh Real Madridin si klubin e ëndrrave dhe ka si zgjedhje të parë vazhdimin e karrierës te gjiganti spanjoll.