Tuchel kapet nga kamerat duke iu drejtuar me tone të ashpra një lojtari të Anglisë, më pas bëri lëvizjen që përmbysi ndeshjen

Pak para vendimit që doli përcaktues për kalimin e Anglisë më tej, kamerat filmuan Thomas Tuchelin teksa i fliste me shumë zemërim njërit prej futbollistëve të tij.

Anglia zbriti në stadiumin e Atlantës me statusin e favorites absolute për të prerë biletën drejt fazës së 1/8 së finales në Kupën e Botës 2026, aty ku u ndesh me Republikën Demokratike të Kongos në sfidën e parë me eliminim direkt.

Gjithsesi, nisja e takimit ishte tronditëse për anglezët, pasi Brian Cipenga realizoi për përfaqësuesen afrikane që në minutën e shtatë.

Gjatë gjithë përballjes, ekipi i drejtuar nga Tuchel prodhoi raste të shumta, por Lionel Mpasi ishte në një mbrëmje të shkëlqyer dhe me pritjet e tij e mbajti Kongon në avantazh për një pjesë të madhe të lojës.

Ashtu siç ka ndodhur shpesh këtë verë, kur Anglisë i nevojitej më shumë një zgjidhje, përgjegjësinë e mori Harry Kane. Kapiteni shënoi në minutën 75 dhe 86, duke vulosur suksesin 2-1 të skuadrës së tij.

Megjithatë, kthesa e ndeshjes nuk erdhi vetëm nga dopieta e Kane. Pak çaste përpara golit të barazimit, Tuchel ndërhyri me një lëvizje që mund të ketë mbajtur gjallë synimin e Anglisë në këtë Botëror.

Menjëherë pas minutës së 60-të, trajneri gjerman u kap nga kamerat duke i bërtitur i irrituar mbrojtësit Djed Spence, i cili po luante në krahun e djathtë të mbrojtjes për shkak të mungesave të Reece James dhe Jarell Quansah.

Spence po kalonte një ndeshje të vështirë dhe vetëm 10 minuta pas reagimit të ashpër të Tuchelit, ai u zëvendësua nga Eberechi Eze i Arsenalit.

Për t’i dhënë ekipit më shumë peshë në sulm, Tuchel e spostoi Declan Rice në të djathtë të mbrojtjes, ndërsa Eze u afrua në repartin ofensiv. Vetëm katër minuta pas këtij ndryshimi, Harry Kane gjeti golin e barazimit.

Më vonë, sulmuesi anglez realizoi edhe golin e dytë personal, që solli fitoren. Edhe pse Eze nuk pati përfshirje të drejtpërdrejtë në asnjërin prej golave, energjia dhe ndikimi i tij në fushë u vlerësuan si elementë të rëndësishëm në rikthimin e Anglisë.