Trump kërkon një Botëror tjetër në SHBA, pa Kanadanë dhe Meksikën

Teksa Kupa e Botës që po zhvillohet në Amerikën e Veriut po hyn në fazën përmbyllëse, presidenti i Shteteve të Bashkuara, Donald Trump, ka deklaruar se dëshiron që SHBA-të të jenë sërish nikoqire të turneut në një të ardhme të afërt. Ai e bëri këtë deklaratë gjatë një pritjeje në Nju Jork, përpara finales së së dielës.

Në edicionin e këtij viti, Shtetet e Bashkuara kanë pritur 78 nga 104 ndeshje gjithsej, përfshirë të 12 përballjet që nga çerekfinalet e deri në fund të garës.

Pavarësisht kësaj, Trump synon që Botërori i ardhshëm të organizohet i tëri nga SHBA-të, pa bashkëorganizatorë.

“Ju duhet të rizgjidhni Shtetet e Bashkuara të Amerikës. Por këtë herë do të lëmë jashtë Kanadanë dhe Meksikën si pritëse”, u shpreh Trump gjatë pritjes në Trump Tower.

Botërori i vitit 2038 mbetet gara e radhës për të cilën ende nuk është caktuar vendi pritës. Në aspektin historik, një afat 12-vjeçar do të konsiderohej i shkurtër për një shtet që synon të organizojë sërish Kupën e Botës, megjithëse FIFA është larguar disi nga ky parim me vendimet për turnetë e viteve 2030 dhe 2034.

Kupa e Botës 2030, që përkon me 100-vjetorin e saj, do të zhvillohet në Afrikë, me Marokun, në Evropë, me Spanjën dhe Portugalinë, si edhe në Amerikën e Jugut, me Uruguain, Argjentinën dhe Paraguain. Ndërkohë, Botërori i vitit 2034 do të mbahet në Arabinë Saudite, në Azi. Sipas rregullave aktuale të FIFA-s për organizimin, Amerika e Veriut dhe Oqeania janë kontinentet e vetme që mund të presin turneun e vitit 2038.

Trump bëri të ditur gjithashtu se presidenti i FIFA-s, Gianni Infantino, e kishte kontaktuar për mundësinë që SHBA-të dhe Kina të organizojnë bashkërisht Kupën e Botës në të ardhmen. //