Trabzonspor konfirmon negociatat me Salah, zyrtarizimi pritet pas kontrolleve mjekësore

Trabzonspor ka bërë të ditur se ka nisur negociatat për transferimin e Mohamed Salah, ndërsa presidenti i klubit turk shpreson që marrëveshja me sulmuesin egjiptian të mbyllet jo më vonë se fundi i kësaj jave.

Pas nëntë sezonesh me Liverpoolin, Salah mbeti lojtar i lirë gjatë kësaj vere dhe tërhoqi interes të madh nga klubet në Evropë dhe Arabinë Saudite.

Megjithatë, Trabzonspor duket se ka fituar garën për shërbimet e tij. Klubi i Superligës së Turqisë konfirmoi se futbollisti do të mbërrijë sot, të mërkurën, në Stamboll për t’iu nënshtruar testeve mjekësore.

Në njoftimin zyrtar, Trabzonspor deklaroi se bisedimet për afrimin në skuadër të futbollistit profesionist Mohamed Salah, i cili aktualisht është lojtar i lirë, tashmë kanë filluar.

Sipas të njëjtës deklaratë, egjiptiani do të zbarkojë sot në aeroportin e Stambollit, ndërsa gjatë mbrëmjes do të udhëtojë drejt Trabzonit.

Presidenti i Trabzonspor, Ertugrul Dogan, deklaroi për televizionin A Spor se transferimi ende nuk është finalizuar zyrtarisht. Ai konfirmoi gjithashtu se Salah pritet të mbërrijë të mërkurën në Stamboll për kontrollet mjekësore.

Pas përfundimit të vizitave, sulmuesi pritet të vazhdojë udhëtimin drejt Trabzonit, ku do të firmosë kontratën. Sipas Dogan, nënshkrimi duhet të realizohet të enjten.

Salah largohet nga Liverpooli me një bilanc prej 257 golash në 442 paraqitje gjatë nëntë viteve të tij në klub. Në këtë periudhë, ai fitoi dy tituj të Ligës Premier dhe një trofe të Ligës së Kampionëve.

34-vjeçari e nisi aventurën evropiane në vitin 2012 me Baselin. Përpara transferimit te Liverpooli në vitin 2017, ai ishte pjesë edhe e Chelseat, Fiorentinës dhe Romës.