Teuta zgjedh Banskon për fazën përgatitore, Edlir Tetova teston skuadrën me 4 miqësore para sezonit të ri

Pas sigurimit të qëndrimit në elitë me mbylljen e ndeshjes së play-out në “Abissnet Superiore”, te Teuta puna është përqendruar plotësisht te ndryshimet e mëdha në skuadër.

Klubi durrsak ka hyrë në një proces të thellë transformimi, duke nisur nga pankina dhe stafi teknik, deri te lëvizjet e shumta në organik me afrime dhe largime. Në kuadër të përgatitjeve, ekipi do të udhëtojë drejt Bullgarisë, aty ku do të zhvillojë fazën përgatitore në Bansko, destinacioni i njëjtë i zgjedhur edhe nga Egnatia.

Sipas njoftimit më të fundit të publikuar në rrjetet sociale nga klubi i Teutës, gjatë kësaj faze janë programuar 4 ndeshje miqësore. Takimi i parë do të luhet më 10 korrik ndaj Ludogorets, ndërsa më 11 korrik është planifikuar sfida me Lokomotiv Sofia.

Dy testet e tjera do të zhvillohen më 15 korrik kundër Hapoel Haifas dhe më 16 korrik ndaj CSM Slatinas.

Përmes këtyre përballjeve, trajneri Edlir Tetova do të ketë rastin të shohë nga afër kontingjentin që ka në dispozicion, para nisjes së aventurës së re me Teutën në sezonin 2026/27 të Superiores.