Superkupa e Spanjës 2027 në Stamboll: Zyrtarizohen datat, përballjet, stadiumi dhe shpërblimet

Edicioni i vitit 2027 i Superkupës së Spanjës do të organizohet në Stamboll të Turqisë, ku katër prej klubeve më të mëdha të futbollit spanjoll do të garojnë për trofeun.

Kompeticioni është parashikuar të luhet në fillim të shkurtit 2027. Pjesë e tij do të jetë sërish Barcelona, fituese e dy edicioneve të fundit.

Federata Mbretërore Spanjolle e Futbollit (RFEF) e ka konfirmuar zyrtarisht Stambollin si qytetin pritës, ndërsa të gjitha ndeshjet do të luhen në stadiumin olimpik “Ataturk”.

Në ceremoninë zyrtare për prezantimin dhe nënshkrimin e marrëveshjes në Stamboll pritet të jetë i pranishëm presidenti i RFEF-së, Rafael Louzan. Atij do t’i bashkohen përfaqësues të lartë të institucioneve turke dhe ndërkombëtare.

Zgjedhja e qytetit turk u bë për shkak se Arabia Saudite, e cila zakonisht e ka pritur Superkupën, në atë periudhë do të jetë e angazhuar me një tjetër aktivitet të madh sportiv. Vendimi erdhi pas një procesi vlerësimi të kryer në bashkëpunim me kompaninë SELA, partneren e RFEF-së për organizimin e turneut jashtë territorit spanjoll.

Barcelona, Real Madridi, Real Sociedad dhe Atletico Madridi janë katër skuadrat që do të marrin pjesë në edicionin e vitit 2027.

Më 2 shkurt do të zhvillohet gjysmëfinalja e parë, në të cilën Real Sociedadi do të përballet me Real Madridin. Po në të njëjtën ditë, Barcelona do të luajë kundër Atletico Madridit.

Ndeshja finale është caktuar për 7 shkurt, kur fituesit e dy gjysmëfinaleve do të përballen për trofeun.

Krahas mundësisë për të fituar titullin, turneu u garanton pjesëmarrësve edhe të ardhura të konsiderueshme. Sipas marrëveshjes së raportuar nga AS, katër klubet kanë pranuar që shumën prej 40 milionë eurosh ta ndajnë në pjesë të barabarta.

RFEF ka nënvizuar se zhvillimi i Superkupës jashtë Spanjës krijon të ardhura që përdoren më pas për të mbështetur qindra klube të niveleve më të ulëta të futbollit spanjoll, si në garat e meshkujve, ashtu edhe në ato të femrave.

Takimet e Superkupës së Spanjës pritet të transmetohen në mbi 150 vende të botës, duke i dhënë turneut përmasa të rëndësishme ndërkombëtare për futbollin spanjoll.