Sulmi i qenve ndaj një 17-vjeçari, Ferland Mendy do të dalë para gjykatës në Madrid

Mbrojtësi i Real Madridit, Ferland Mendy, do të përballet më 21 dhjetor me gjykatën penale në Madrid. Futbollisti akuzohet për neglizhencë lidhur me një sulm të rëndë të qenve të tij, gjatë të cilit u plagos një i mitur 17-vjeçar.

Për lojtarin francez, prokuroria ka kërkuar një gjobë prej 1,200 eurosh, si edhe pagesën e 5,700 eurove si dëmshpërblim për të dëmtuarit.

Çështja lidhet me ngjarjen e 4 janarit 2023 në Alcobendas. Atë ditë, katër qentë e Mendy u larguan nga prona e tij përmes portës, e cila nuk ishte mbyllur siç duhej.

Një nga qentë iu drejtua një gruaje që kishte dalë për të shëtitur qenin e saj. Sulmi ndaj kafshës ishte aq i rëndë, sa veterinerëve iu desh ta eutanizonin.

Një 17-vjeçar, i cili ndodhej aty duke shëtitur qenin e vet, pa çfarë po ndodhte dhe u përpoq t’i vinte në ndihmë gruas. Gjatë ndërhyrjes, qeni sulmoi edhe atë.

Nga kafshimi i fortë në këmbën e majtë, i mituri mori katër plagë, disa me diametër deri në dy centimetra. Për shkak të dëmtimeve, ai u operua dhe shërimi i tij zgjati 30 ditë.

Ndërhyrje kirurgjikale urgjente iu desh edhe qenit të 17-vjeçarit. Ai kishte marrë kafshime në qafë e gjoks dhe kishte humbur një dhëmb.

Sipas prokurorisë, Mendy nuk ushtroi kujdesin e kërkuar dhe nuk ndërmori masat e nevojshme për t’u siguruar që porta të mbyllej mirë pas hyrjes së automjetit në pronë. Mbi këtë pretendim mbështetet akuza për neglizhencë ndaj tij.

Gazeta spanjolle Sport, duke iu referuar vendimit procedural të 1 tetorit, raporton se seanca do të zhvillohet në gjykatën e Madridit, në rrugën Julian Camarillo. Për të marrë pjesë në gjyq janë thirrur Mendy, viktimat, dëshmitarët dhe ekspertët, ndërsa gjatë dëshmisë futbollisti do të ketë ndihmën e një përkthyesi të frëngjishtes.