Suksesi ndaj Bjellorusisë i jep krahë Shqipërisë, superkompjuteri rrit shanset për fitoren e grupit

Fitorja ndaj Bjellorusisë me shifrat 2-0 në ndeshjen e parë në Ligën e Kombeve, ka rritur shanset e Shqipërisë për të qenë ekipi fitues i grupit dhe për t’u ngjitur përsëri në Ligën B.

Kuqezinjtë shiheshin që në fillim si favoritë për të fituar Grupin 1 ku bëjnë pjesë, por tashmë me këtë sukses, mundësia e tyre për të avancuar më tej është rritur, ndonëse Finlanda shihet si një rival shqetësues.

Superkompjuteri i “Football Meets Data”, në projeksionet e tij sheh se Shqipëria tashmë ka 62,6% mundësi që të mbyllë grupin në vendin e parë, me një mesatare prej 13,4 pikësh që dalin nga 10 mijë simulimet e saj.

Pas fitores në ndeshjen e parë, projeksionet për një vend të dytë të mundshëm kanë shkuar në 28,3% ndërsa për vendin e tretë vlerësohen në 9%.

Në total, vlerësohet në 75% mundësia e ngjitjes një ligë më lart, si fituese e grupit, apo edhe nëpërmjet play-off.