Sllovenia vendosi rekord të ri të çuditshëm në Euro 2024 në humbjen nga Portugalia

Kombëtarja e Sllovenisë ka thyer një rekord të çuditshëm në Kampionatet Evropiane dhe Kupën e Botës pasi barazoi 0-0 ndaj Portugalisë të hënën mbrëma.

Faza e 1/8-tës e Kampionatit Evropian ‘Gjermani 2024’ përfundon sot (e martë) mbrëma, pasi Holanda përballet me Rumaninë dhe Austria kundër Turqisë në ndeshjet e fundit të fazës së parë me eliminim direkt.

Të hënën në mbrëmje, Franca shënoi një gol të vonë për të mposhtur Belgjikën 1-0, ndërsa Sllovenia arriti të mbajë Portugalinë në barazim 0-0, por në fund humbi 3-0 në penallti.

Dhe rezultati i fundit do të thotë se Sllovenia ka thyer një rekord unik të Kampionatit Evropian dhe Kampionatit Botëror.

Sipas faqeve në rrjetin social X, Sllovenia është ekipi i parë kombëtar në historinë e Kampionatit Evropian dhe Kupës së Botës që u eliminua me katër barazime në katër ndeshje.

Në ndeshjen e parë të Euro 2024, Sllovenia barazoi 1-1 me Danimarkën, ndërsa e përsëritën këtë rezultat katër ditë më vonë kundër Serbisë.

Dhe në ndeshjen e fundit të grupit, skuadra e Matjaz Kek mbajti Anglinë në një barazim pa gola, duke i siguruar të dyja ekipeve kalimin në fazën eliminatore.

Ndërsa dolën për t’u përballur me Portugalinë në fazën e 1/8-tës, shumë menduan se Sllovenia nuk kishte asnjë shans kundër skuadrës plotë yje të Roberto Martinez.

Por, lojtarët e ‘dobët’ mbijetuan në 120 minuta, me momentin më të madh të ndeshjes që erdhi teksa Cristiano Ronaldo u pa duke qarë pasi humbi një penallti në minutën e 15-të të kohës shtesë, e cila ka të ngjarë të kishte siguruar përparimin për skuadrën e tij.

Sllovenia pati një shans të madh të vetin në minutën e 115-të pas një gabimi të mbrojtësit portugez Pepe, që lejoi yllin slloven Benjamin Sesko të dilte i vetëm përball portierit, por Diogo Costa mori më të mirën në ‘1 kundër 1’ duke ndalur goditjen e Seskos dhe duke e çuar ndeshjen në penallti.

Costa ishte hero edhe në goditjet e penalltive, duke pritur të tre penalltitë e Sllovenisë, që do të thotë se golat e Ronaldos, Bruno Fernandes dhe Bernardo Silva ishin të mjaftueshëm për të siguruar fitoren për Portugalinë.

Portugalia do të përballet me Francën në çerekfinale të premten mbrëma në Volksparkstadion të Hamburgut, me fillimin në orën 21:00.