Skënderbeu me vetëm 1 pikë pas 3 javësh, Ahmataj: Fati nuk na ka ndihmuar, Egnatia dhe Dinamo nuk treguan epërsi ndaj nesh

Skënderbeu u mposht 2-1 nga Egnatia në stadiumin “Arena Egnatia”, në takimin e javës së tretë të “Abissnet Superiore”. Pas përfundimit të sfidës, trajneri i skuadrës korçare, Julian Ahmataj, analizoi paraqitjen e ekipit të tij.

Ahmataj theksoi se shorti i vuri korçarët që në start përballë Egnatias dhe Dinamos, dy skuadrat më në formë dhe që kanë avancuar më larg. Sipas tij, vështirësia e këtyre përballjeve ishte e pritshme, por në fushë nuk u pa ndonjë diferencë mes rivalëve dhe Skënderbeut. Trajneri shtoi se fati nuk ka qenë në anën e ekipit të tij, pasi në të dyja ndeshjet korçarët patën mundësi të shënonin përpara kundërshtarëve, por shpërdoruan raste të pastra, çka përbën keqardhje.

Tekniku shpjegoi se një ekip i ri ka nevojë për një shtysë pozitive që të arrijë të performojë mirë. Ai pranoi se Skënderbeu ka ende limite për të eksploruar, në mënyrë që skuadra të ngjitet në një nivel më të lartë. Ahmataj pret që situata të jetë ndryshe në ndeshjet brenda, ku lojtarët marrin më shumë adrenalinë, ndonëse nuk mendon se kjo i mungoi ekipit ndaj Egnatias. Sipas tij, goli u pësua nga neglizhenca, njësoj si në duelin me Dinamon, por bëhet fjalë për një problem lehtësisht të zgjidhshëm. Ai kujtoi gjithashtu se futbollistët janë të rinj, nuk e njohin ende kampionatin dhe kanë nevojë për kohë.

Duke iu referuar skemës taktike, Ahmataj deklaroi se, pavarësisht cilësive të lojtarëve, vendosja me 5 mbrojtës e bën të vështirë daljen lart me presion. Skënderbeu është punuar më shumë në sistemin 4-2-3-1, i cili do të jetë baza gjatë gjithë kampionatit dhe u përshtatet futbollistëve. Ndryshimi i skemës erdhi për shkak të mënyrës së lojës së Dinamos dhe Egnatias, që rreshtohen në romb. Sipas trajnerit, manovrat e ekipit do të qartësohen gradualisht.

Ahmataj nënvizoi se shumë prej lojtarëve janë afruar rishtazi, ndaj nuk kanë krijuar ende automatizmat dhe nuk e njohin mirë lojën e njëri-tjetrit. Kjo pritet të përmirësohet me kalimin e ndeshjeve, ndërsa stafi është përqendruar te puna me repartin e mbrojtjes. Ai kujtoi se Skënderbeu luajti një pjesë të takimit ndaj Dinamos me të njëjtin sistem dhe nuk u rrezikua aspak. Edhe në pjesën e dytë kundër Egnatias, sipas tij, vendasit nuk krijuan ndonjë mundësi të pastër, ndërsa rastet më të qarta i patën korçarët. Megjithatë, futbollistëve të sapoardhur u duhet kohë për t’u njohur më mirë mes tyre.

Në vlerësimin e trajnerit ndikon si mungesa e njohjes së kampionatit, ashtu edhe gjendja e lojtarëve. Disa prej tyre iu bashkuan skuadrës me vonesë, ndaj grupi nuk ka qenë i plotë që prej fillimit. Ahmataj pret që forma të përmirësohet hap pas hapi përmes ndeshjeve. Ai pranoi gjithashtu se lodhja sjell humbje të përqendrimit dhe kërkoi më shumë vëmendje, por shprehu bindjen se Skënderbeu është një skuadër shumë e fortë për çdo kundërshtar.

I pyetur nëse bilanci prej 1 pike në 3 ndeshje mund të krijojë presion, Ahmataj u shpreh se nuk pret ndonjë pengesë psikologjike. Sipas tij, të gjitha ekipet përjetojnë periudha të tilla dhe te Skënderbeu e dinin që fillimi do të ishte i vështirë. Trajneri theksoi se bëhet fjalë për një skuadër të sapoardhur, e cila ka ndryshuar 80% të përbërjes dhe, për këtë arsye, ka nevojë për kohën e vet.