Situata shqetësuese e Ernest Muçit, në Turqi zbulojnë të rejat rreth dëmtimit të sulmuesit

Sulmuesi i Kombëtares shqiptare, Ernest Muçi, ka humbur startin e sezonit me fanellën e Trabzonspor, për shkak të një dëmtimi që ka pësuar pak ditë para se të nisnin aktivitetet zyrtare për skuadrën e tij.

Muçi  kishte qenë protagonist në të gjitha ndeshjet miqësore që zhvilloi klubi turk, por pak ditë para startit të kampionatit, ai pësoi një dëmtim që e la jashtë fushave të lojës.

Sipas mediave turke, fillimisht u fol për 2-3 javë pushim për lojtarin. Por tashmë mësohet se rikuperimi i tij ka ecur me ritme më të shpejta se sa mendohet.

“61saat” shpjegon se futbollisti do të mungojë edhe në ndeshjen e mesjavës që Trabzonspor luan në play-off të Ligës së Europës ndaj Ferencvarosh. Por ai pritet që të jetë i gatshëm për duelin e fundjavës ndaj Bashakshehir në kampionat. Nëse Muçi nuk do ia dalë që të luajë nga fillimi, do të jetë të paktën në stol si alternativë për trajnerin Teke në atë sfidë.