Shqipëria mund të bëhet nikoqire e eventit të madh botëror ‘Globe Soccer Awards’

Kryeministri i Shqipërisë, Edi Rama, ka konfirmuar se Shqipëria është në bisedime me organizatorët e çmimit ‘Globe Soccer Awards’ për ta sjellë këtë event në Tiranë.

Çmimi ‘Globe Soccer Awards’ është një ngjarje prestigjioze ndërkombëtare që nderon arritjet më të mëdha në futboll çdo vit.

Kjo ngjarje është e njohur për ndarjen e çmimeve në disa kategori, duke përfshirë ‘Lojtari i Vitit’, ‘Trajneri i Vitit’, ‘Klubi i Vitit”.

Në edicionin e vitit 2024 të ‘Globe Soccer Awards’, çmimi për ‘Lojtarin e Vitit’ i takoi Vinicius Junior.

“Ndërkohë jemi në një diskutim së fundmi për të sjellë në Tiranë, 95 për qind në Tiranë, sepse jemi duke diskutuar si opsione dhe Durrësin dhe Vlorën, edicionin evropian të çmimit të globit të futbollit”.

“Eveniment i jashtëzakonshëm që mbahet në mënyrë të përvitshme sa i përket vetë edicionit global në Dubai dhe për edicionin evropian, organizatorët janë në një diskutim me Madridin dhe me ne”.

“Kemi shumë arsye të besojmë se zgjedhja do të bjerë mbi ne dhe do të jetë fantastike që për shembull çmimin e futbollistit më të mirë të vitit nga Globe Soccer, Yamalit fjala bie t’ia japim këtu në Tiranë”.

“Po punojmë edhe me Padel International, është një tjetër aktivitet i jashtëzakonshëm që ka mbulim të jashtëzakonshëm mediatik në të gjithë botën dhe po punojmë që të sjellim në Shqipëri një edicion të tij”, ka thënë Rama.