Serie A zyrtarizon rishikimet e VAR-it dhe arbitrazhit për edicionin 2026/27, mes tyre një rregull i debatueshëm që UEFA e ka refuzuar

Federata Italiane e Gjyqtarëve (AIA) ka bërë të ditura ndryshimet në mënyrën e zbatimit të rregullave për sezonin e ardhshëm të Serie A, 2026/27. Paketa e re parashikon rol më të gjerë për VAR-in, masa më të ashpra ndaj humbjes së kohës dhe kritere të reja për rastet kur pengohet një mundësi e qartë për gol.

Sipas football-italia.net, këto udhëzime mbështeten pjesërisht te rekomandimet e Bordit Ndërkombëtar të Federatave të Futbollit (IFAB), të përdorura në Kupën e Botës 2026. Ato do t’u shpjegohen lojtarëve dhe trajnerëve para nisjes së kampionatit.

Ndërhyrje më të gjera nga VAR-i

Dhoma e VAR-it do të ketë mundësi shtesë për të ndrequr vendime që mund të kenë ndikim të drejtpërdrejtë në zhvillimin e ndeshjes. Asistenti video, për shembull, mund të korrigjojë një karton të dytë të verdhë të akorduar gabimisht, nëse ndërkohë është kryer zëvendësimi i futbollistit.

Po ashtu, do të lejohet rishikimi i një goditjeje këndi të dhënë gabimisht, por vetëm në rastet kur kjo ndërhyrje nuk pengon vijimin e shpejtë të lojës.

Rregulla për të kufizuar vonesat

Në përpjekje për të rritur kohën efektive të lojës, e konsideruar një nga çështjet kryesore të kampionatit, Serie A po vendos rregulla për kryerjen më të shpejtë të zëvendësimeve.

Protokolli i ri përcakton se lojtari që zëvendësohet duhet të largohet nga fusha brenda dhjetë sekondave pasi gjyqtari i katërt shfaq numrin e tij. Nëse ky afat nuk respektohet, futbollisti që pret të hyjë nuk do të mund të aktivizohet deri në ndërprerjen e radhës së lojës ose pasi të ketë kaluar një minutë e plotë.

Gjithashtu, për rivëniet anësore dhe goditjet nga porta është vendosur një limit prej pesë sekondash. Kur ky afat tejkalohet, arbitri mund t’ia kalojë topin skuadrës kundërshtare; ndërsa për vonesë gjatë nisjes nga porta, ai mund të akordojë goditje nga këndi për rivalët.

Rregullat për dëmtimet dhe dispozita të tjera

Edhe protokolli i dëmtimeve i përdorur në Kupën e Botës do të zbatohet në Serie A. Një futbollist që merr trajtim mjekësor në fushë duhet të qëndrojë jashtë lojës për të paktën një minutë përpara rikthimit.

Përjashtim nga kjo masë bëhet në rastet e përplasjeve të rënda në kokë, dëmtimeve të shkaktuara nga faulle që ndëshkohen me karton të verdhë ose të kuq, si edhe kur i dëmtuar është portieri.