Serbia mposht Rusinë U-21, por miqësorja në Stara Pazova përfundon me përplasje fizike

Serbia triumfoi 2-1 ndaj Rusisë në duelin e dytë miqësor mes përfaqësueseve U-21, duke barazuar llogaritë pas humbjes 3-1 në takimin e parë, të zhvilluar disa ditë më herët.

Ndeshja në Stara Pazova, megjithatë, u përshkua nga një episod i rëndë në pjesën e dytë. Në minutën e 68-të, një përplasje mes lojtarëve u shndërrua brenda pak çastesh në shtyrje, grushte dhe shqelma.

Shkëndija e incidentit ishte dueli mes mesfushorit rus Mikhail Umnjikov dhe serbit Matija Mitrovic. Pas ndërhyrjes së pakujdesshme të Umnjikovit, Mitrovic i hodhi diçka, ndërsa futbollisti rus u kthye drejt tij dhe nisi përplasja.

Situata u përshkallëzua menjëherë, pasi në konflikt u përfshinë edhe futbollistë të tjerë të të dyja skuadrave. Në fushë pati kapje për qafe dhe goditje, duke krijuar një rrëmujë të madhe. Shokët e skuadrës dhe pjesëtarët e stafit teknik ndërhynë për t’i ndarë lojtarët.

Pas rikthimit të qetësisë, gjyqtari Stanko Ostracanin ndëshkoi dy protagonistët kryesorë të përplasjes. Mikhail Umnjikov u përjashtua me karton të kuq direkt, ndërsa Matija Mitrovic mori kartonin e dytë të verdhë dhe u detyrua të linte fushën.

Në momentin e incidentit, Serbia kryesonte 2-1. Matija Mitrovic kishte kaluar vendasit në avantazh duke shënuar nga pika e bardhë në minutën e 34-të, ndërsa Marko Veliçkovic e thelloi epërsinë në fillim të pjesës së dytë.

Rusia reagoi në minutën e 64-t, kur Aleksandar Pomaljuk shënoi nga një goditje penalltie dhe ngushtoi diferencën. Megjithatë, rezultati nuk ndryshoi deri në vërshëllimën e fundit dhe Serbia siguroi fitoren 2-1.