Seiwald përballet me ish-trajnerin e tij Foda: Dueli Austri–Kosovë merr ngjyrim të veçantë

Ndeshja e së dielës mes Austrisë dhe Kosovës do të ketë një domethënie të veçantë për Nicolas Seiwald. Në stolin kundërshtar do të jetë Franco Foda, trajneri që pati një rol të rëndësishëm në hapat e parë të mesfushorit me përfaqësuesen austriake.

Foda, ish-përzgjedhës i Austrisë dhe aktualisht drejtues i Kosovës, i dha Seiwaldit debutimin me ekipin kombëtar rreth pesë vjet më parë.

Këtë herë, të dy do të jenë në pozicione të kundërta: Foda do ta udhëheqë Kosovën, ndërsa Seiwald do të synojë të ndihmojë Austrinë të sigurojë tri pikët në Vjenë.

Futbollisti i Leipzigut e konsideron këtë përballje si një ribashkim të veçantë, për shkak të bashkëpunimit që kanë pasur në fillimet e tij me Kombëtaren austriake.

“Do të jetë një ndeshje krejtësisht ndryshe. Synojmë të dominojmë dhe t’i mbajmë tri pikët në Vjenë. Ribashkimi me Fodan do të jetë padyshim shumë i veçantë”, deklaroi Seiwald pas fitores ndaj Izraelit.

Mesfushori e sheh takimin me Kosovën ndryshe nga sfida e kaluar ndaj Izraelit. Ai paralajmëroi se Austria do të kërkojë kontrollin e lojës dhe do të hyjë në fushë me synimin për të fituar.

Përveç rëndësisë së pikëve, dueli do të shënojë edhe takimin emocional mes trajnerit dhe lojtarit që kanë punuar së bashku në fazën e hershme të karrierës së këtij të fundit me përfaqësuesen.