Rreth 10 milionë fëmijë në botë mund të përdorin substanca dopingu

Një hetim i transmetuesit publik gjerman ARD ngre shqetësimin për përdorimin e dopingut nga sportistët e mitur: të paktën 10 milionë fëmijë në mbarë botën mund të jenë të përfshirë në këtë praktikë, e cila kërcënon shëndetin dhe të ardhmen e tyre sportive.

Vlerësimi është pjesë e një serie dokumentarësh, hartuar pas gjashtë vitesh kërkime në mbi 50 shtete dhe në 25 sporte të ndryshme. Për llogaritjen e shifrës, ekipi i ARD-së dhe ekspertët shqyrtuan 44 studime nga 15 vende, të mbështetura në anketime anonime me sportistë të rinj.

Sipas të dhënave të Kombeve të Bashkuara, rreth 200 milionë fëmijë të moshës 8 deri në 17 vjeç marrin pjesë në sporte garuese në mbarë botën. Studimet e analizuara vlerësojnë se nga 5 deri në 6 për qind e tyre përdorin substanca që synojnë rritjen e performancës.

Paulo David, ish-sekretar i Komitetit të OKB-së për të Drejtat e Fëmijëve, tha se kjo përqindje përfaqëson rreth 10 milionë të mitur që përdorin doping. Ai e përshkroi fenomenin si problem serioz, ndaj të cilit institucionet sportive, deri tani, nuk kanë reaguar me vëmendjen e duhur.

Hulumtimi identifikon steroidet anabolike dhe hormonin e rritjes si substancat që përdoren më shpesh. Disa fëmijë, megjithatë, mund t’i marrin preparatet pa e ditur përmbajtjen e tyre, pasi ato u paraqiten si vitamina ose produkte të padëmshme.

Dokumentari vëren se dopingut nuk i drejtohen vetëm sportistët e nivelit elitar. Të miturit mund të përballen me këto substanca edhe në nivele më të ulëta të garave dhe, sipas ekspertëve, sigurimi i tyre nuk është gjithmonë i vështirë.

Autorët kanë dokumentuar raste kur trajnerë, zyrtarë sportivë, prindër e madje mjekë ndihmojnë në krijimin e një mjedisi ku rezultatet dhe suksesi kanë përparësi ndaj shëndetit të sportistëve të rinj.

Vlerësimet shoqërohen edhe me mungesë të dhënash të pavarura në disa vende ku dyshohet se dukuria është më e përhapur, ndër to Rusia, India dhe Kina.

Ndërkohë, shifrat e kontrolleve antidoping paraqesin një kontrast të fortë: sipas të dhënave të përfshira në hetimin e ARD-së, vetëm rreth 100 të mitur në vit dalin pozitivë në testet për doping. Mospërputhja ngre pikëpyetje për efektivitetin e testimeve dhe për numrin e rasteve që mund të mos zbulohen.

Përdorimi i këtyre substancave në moshë të hershme mund të sjellë efekte anësore dhe pasoja afatgjata për shëndetin e zhvillimin e fëmijëve. Seria e ARD-së, të cilën autorët e cilësojnë si vështrim në anën më të errët të sportit botëror, synon të vërë në pah përgjegjësinë e institucioneve sportive për mbrojtjen e sportistëve të mitur.

Publikimi i serisë dokumentare nis më 13 nëntor.