Rosario i kushton një homazh emocionues Messit për ndeshjen e fundit me Argjentinën

Lionel Messi, i konsideruar padyshim si futbollisti më i mirë i të gjitha kohërave, pritet t’i japë fund aventurës së tij me fanellën e kombëtares së Argjentinës sonte, të martën.

Takimi ndaj Beninit, që nis në orën 20:00 në stadiumin “Monumental” të Buenos Airesit, do të jetë paraqitja e fundit e gjeniut argjentinas me përfaqësuesen.

Ndërsa përgatiteshin për këtë sfidë të veçantë, banorët e Rosario-s, qytetit ku Messi ka lindur, shpalosën një fanellë gjigante të Argjentinës. Në të ishte shkruar dukshëm mesazhi: “FALEMINDERIT #10”.

Ky gjest simbolik përcolli emocionet e bashkëqytetarëve të tij, të cilët i shprehën mirënjohje kapitenit për ndikimin e jashtëzakonshëm që pati në transformimin e ekipit kombëtar.

“Faleminderit, kapiten. Na dhe gjithçka. Na bëre të besojmë sërish, të ëndërrojmë të pamundurën dhe na dhurove momente të paharrueshme që do të mbeten me ne për gjithë jetën”.

Mesazhi pasqyronte edhe ndjesinë e vështirë se futbolli argjentinas po hyn në një kapitull të ri, tashmë pa figurën e tij legjendare në krye.

“Asgjë nuk do të jetë më njësoj. Nuk jemi gati të të lëmë të shkosh, por do të të ndjekim kudo që të shkosh”, thuhej në letrën e përgatitur në Rosario.

Largimi i Messit nga kombëtarja shënon përfundimin e një epoke të artë, gjatë së cilës Argjentina arriti suksese të mëdha. Me të si udhëheqës, Gauçot fituan tre trofe madhorë: dy edicione radhazi të Copa America, në vitet 2021 dhe 2024, si edhe Kupën e Botës 2022 në Katar, kulmin e karrierës së tij.

Përballja e sotme me Beninin do të jetë ndeshja e 208-të e Messit me Argjentinën. Deri tani, ai ka realizuar 125 gola dhe ka regjistruar 68 asistime.

Ndërkohë, në Argjentinë është bërë e ditur se i gjithë vendi do të ndalet në minutën e 10-të të takimit, në një tjetër homazh për kapitenin legjendar.