Ronaldo vihet në shënjestër të batutave gjatë festës së Spanjës për Kupën e Botës

Mijëra tifozë u mblodhën në Madrid për të kremtuar triumfin e Spanjës në Kupën e Botës, ndërsa gjatë ceremonisë festive nuk mungoi as një batutë në adresë të Cristiano Ronaldos.

Kombëtarja e drejtuar nga Luis de la Fuente, e cila mposhti Argjentinën në finale, u mirëprit në kryeqytetin spanjoll nga rreth dy milionë mbështetës.

Grupi me 26 futbollistë dhe stafi teknik zhvilluan takime me familjen mbretërore të Spanjës dhe kryeministrin Pedro Sanchez. Më pas, ata përshkuan rrugët e Madridit me një autobus të hapur, mbi të cilin ishte vendosur mesazhi: “Yjet shkëlqejnë së bashku”.

Pika kulmore e festës u regjistrua në sheshin Cibeles, një prej vendeve më të njohura të Madridit. Rreth 120 mijë tifozë ishin të pranishëm aty për të ndjekur prezantimin e lojtarëve në skenë.

Futbollistët spanjollë mbanin veshur bluza me mbishkrimin “Somos Campeones”, që në gjuhën shqipe përkthehet “Jemi kampionë”.

Përpara daljes së tyre në skenë, moderatori Raul Ramos prezantoi në mënyrë të veçantë secilin prej lojtarëve. Vëmendjen më të madhe e mori komenti i tij për Cristiano Ronaldon gjatë prezantimit të sulmuesit të Crystal Palace, Yeremy Pinos.

“Në Lomo del Chentchi, dikur e quanin Pino ‘Cristiano Ronaldo’. I vetmi ndryshim? Pino ka një Kupë Bote”, deklaroi moderatori.

Kjo batutë u prit me të qeshura si nga tifozët e mbledhur në shesh, ashtu edhe nga bashkëmoderatori i ceremonisë.

Portugalia e Cristiano Ronaldos ishte eliminuar nga Spanja në fazën e 1/8 së finales, ndërsa skuadra spanjolle vijoi më pas rrugëtimin e saj deri te fitimi i trofeut.

Ndeshja u vendos nga goli i vetëm i Mikel Merinos së Arsenalit, i realizuar në minutën e parë të kohës shtesë të pjesës së dytë.