Ronaldo rikthehet në Madrid, nis rikuperimin për të qenë gati për Botërorin 2026

Ylli portugez Cristiano Ronaldo është aktualisht jashtë fushave për shkak të një dëmtimi në muskujt e kofshës.

Sulmuesi i Al Nassr ka udhëtuar drejt Madrid për t’iu nënshtruar një trajtimi të specializuar, me synimin që të rikthehet sa më shpejt në formën e tij më të mirë.

Portugezi 41-vjeçar dëshiron që trupi i tij të jetë plotësisht i rikuperuar përpara Botërorit 2026, i cili do të zhvillohet në Meksikë, Kanada dhe Shtetet e Bashkuara.

Sipas raportimeve, Ronaldo po përdor një metodë moderne rikuperimi, një teknikë që aplikon presion pozitiv në indet e këmbëve për të përshpejtuar shërimin e muskujve.

Kjo metodë ndihmon në përmirësimin e qarkullimit të gjakut, redukton ënjtjen dhe përshpejton procesin e rikuperimit pas dëmtimeve.

Trajtimi realizohet përmes një pajisjeje speciale me “çizme” që fryhen dhe ushtrojnë presion në këmbë, të kontrolluara nga një kompjuter qendror. Ky proces stimulon qarkullimin e gjakut dhe ndihmon në çlirimin e mavijosjeve, ndërsa vepron edhe si një masazh relaksues për muskujt.

Seancat zakonisht zgjasin nga 20 deri në 45 minuta, ndërsa për sportistët rekomandohen 8 deri në 12 seanca për rezultate optimale. Kjo metodë përdoret jo vetëm nga atletët profesionistë, por është e aksesueshme për këdo, me një kosto mesatare rreth 55 dollarë për seancë.

Më herët, trajneri i Al Nassr, Jorge Jesus, kishte qetësuar opinionin publik duke deklaruar se gjendja e Ronaldos është nën kontroll dhe se lojtari po ndjek një program të kujdesshëm rikuperimi.

Në fund të marsit 2026 është planifikuar edhe një ndeshje miqësore mes Meksikës dhe Portugalisë, dhe pritet që Ronaldo të jetë gati për këtë përballje.

Ndërkohë, objektivi i madh i sulmuesit mbetet rikthimi në fushë për të vazhduar ndjekjen e rekordit personal prej 1,000 golash në karrierë, si dhe për të qenë në formën më të mirë të mundshme për Botërorin e ardhshëm.