Ronaldo pranë lamtumirës me Portugalinë, zbulohet data e ndeshjes së fundit

Karriera rekordthyese e Cristiano Ronaldos me përfaqësuesen e Portugalisë, mund të mbyllet zyrtarisht së shpejti, sipas raportimeve më të fundit.

Pas spekulimeve të shumta rreth së ardhmes së tij, gazetari Mohammed Aëaad, bëri të ditur se trajneri i portugezëve ka pohuar se data përfundimtare tashmë është vendosur.

Sulmuesi i njohur pritet ta luajë ndeshjen e lamtumirës me kombëtaren më 24 shtator, kur Portugalia do të përballet me Uellsin në Ligën e Kombeve, në stadiumin Jose Alvalade të Lisbonës.

Ky përfundim është i përshtatshëm edhe për trajnerin e ri Jorge Jesus, i cili nuk synon të ndërmarrë ndryshime të befasishme në grupin e futbollistëve.

“Njerëzit mund të mendojnë se trajneri i ri do të vijë dhe do të ndryshojë shumë lojtarë, por kjo nuk do të ndodhë sepse unë nuk jam budalla dhe nuk kam kohë të mjaftueshme për të thirrur lojtarë që nuk ishin në listë këtë herë”, deklaroi Jesus për Canal 11.

Në këtë mënyrë, futbollistit legjendar i krijohet mundësia të largohet me dinjitet nga Portugalia, pasi ka regjistruar 233 paraqitje mbresëlënëse dhe 146 gola për vendin e tij.

Pavarësisht se është 41-vjeç, Ronaldo vijon të luajë në nivel klubesh për Al-Nassr, skuadër me të cilën ka kontratë deri në verën e vitit 2027.

Pasi të mbyllë angazhimet ndërkombëtare, përqendrimi i tij i plotë do të kalojë te objektivi historik për të mbërritur në shifrën magjike të 1,000 golave.