Ronaldo pas barazimit të Portugalisë me RD Kongon: Ky është futbolli

Cristiano Ronaldo doli në mbështetje të bashkëlojtarëve të tij pas barazimit 1-1 që Portugalia regjistroi ndaj Republikës Demokratike të Kongos në ndeshjen e parë të Kupës së Botës 2026, të luajtur në Houston.

Edhe pse kombëtarja portugeze nuk zhvilloi një ndeshje bindëse, sulmuesi veteran nënvizoi se nuk ka vend për alarm dhe se skuadra duhet t’i qaset me besim përballjeve të ardhshme në grup.

Pas përfundimit të takimit, Ronaldo u ndal jashtë stadiumit, ku po firmoste autografe, dhe foli për Sport TV. Ai komentoi paraqitjen e Portugalisë në një përballje të fortë kundër një rivali fizikisht të fuqishëm dhe të mirëorganizuar. Portugalia e gjeti e para avantazhin, por më pas Yoane Wissa riktheu baraspeshën, duke bërë që të dy skuadrat ta mbyllnin ndeshjen me nga një pikë.

Ndonëse zhgënjimi i tij ishte i dukshëm pas vërshëllimës përfundimtare, Ronaldo nuk pranoi të drejtonte kritika ndaj ekipit dhe zgjodhi të ruante një ton optimist.

“Çfarë mungonte? Asgjë nuk mungonte, ky është futbolli. Portugalia mund të kishte fituar, por edhe mund të kishte humbur. Mund të kishte shkuar në të dyja drejtimet”, deklaroi ai, teksa mbronte skuadrën pas 90 minutave të vështira.

Më pas, kapiteni portugez reagoi edhe në rrjetet sociale, duke përcjellë një mesazh për tifozët dhe për kampin e Portugalisë. Duke e pranuar se rezultati nuk ishte ai i dëshiruari, ai kërkoi që ekipi të mbetet i përqendruar dhe i bashkuar për ndeshjet që e presin.

“Nuk ishte fillimi që donim, por kjo është larg të mbaruarit”, shkroi Ronaldo. Ai shtoi gjithashtu thirrjen: “Kokën lart dhe përqendrohuni në ndeshjen e ardhshme”.

Në planin personal, kjo ndeshje solli një tjetër rekord për 41-vjeçarin, i cili u bë lojtari më i moshuar që ka përfaqësuar Portugalinë në një turne madhor, duke lënë pas rekordin e mëparshëm të Pepe-s, i cili e ndoqi sfidën nga tribunat.