Roma fiton bindshëm ndaj Udineses në një përballje me shtatë gola

Roma triumfoi 5-2 në transfertë ndaj Udineses, në duelin e vlefshëm për javën e 10-të të Serie A, duke siguruar tri pikë të rëndësishme.

Formacioni i udhëhequr nga Gian Piero Gasperini e mori menjëherë kontrollin e sfidës dhe ndërtoi një avantazh të thellë që para përfundimit të pjesës së parë.

Goli i parë erdhi në minutën e 10-të, kur Bryan Cristante goditi saktë me kokë pas një krosimi dhe kaloi Romën në epërsi.

Skuadra kryeqytetase vijoi presionin, ndërsa në minutën e 31-të Rodrigo Mora shfrytëzoi një rast ballë për ballë me portierin për të shënuar golin e dytë të Romës.

Vetëm tri minuta më pas, Donyell Malen e thelloi diferencën në 3-0. Në minutën e 37-të, Evan Ndicka realizoi edhe golin e katërt me kokë, pas një korneje të ekzekutuar nga Matias Soule.

Me avantazhin 4-0, Roma u largua drejt dhomave të zhveshjes në fund të pjesës së parë, duke krijuar një epërsi të konsiderueshme për pjesën e mbetur të takimit.

Udinese u shfaq më kërkuese pas pushimit dhe në minutën e 50-të Nicolo Zaniolo shënoi për 4-1. Vendasit gjetën edhe golin e dytë në minutën e 78-të, me Matteo Palma që ngushtoi diferencën në 4-2.

Edhe pse Udinese u përpoq të rikthehej në lojë, Roma e vulosi fitoren në minutën e 92-të. Danilo Ghilardi shënoi golin e pestë dhe përcaktoi rezultatin përfundimtar 5-2.

Pas kësaj fitoreje, Roma numëron 24 pikë dhe vijon të renditet në vendin e tretë të tabelës së Serie A.