Rodri, i pafat pas triumfit në Botëror: Manchester City njofton operimin e detyrueshëm pasi u zgjodh lojtari më i mirë

Manchester City ka bërë të ditur se Rodri i është nënshtruar një ndërhyrjeje të vogël kirurgjikale në shpinë, e cila ka përfunduar me sukses. Mesfushori spanjoll kishte raportuar shqetësime prej kohësh dhe procedura e fundit e ka zgjidhur problemin.

Sipas njoftimit të klubit anglez, lojtari do të nisë tani një periudhë të shkurtër rehabilitimi, ndërsa një datë e saktë për rikthimin e tij në stërvitje nuk është dhënë. “Rodri i është nënshtruar një operacioni të vogël në shpinë, pasi ndiente parehati prej disa kohësh. Ndërhyrja kirurgjikale e adresoi problemin dhe ai do të fokusohet te rehabilitimi përpara se të rifillojë stërvitjen”, thuhet në komunikatë.

Operacioni vjen menjëherë pasi Rodri luajti një rol vendimtar në rrugëtimin e Spanjës drejt titullit në Kupën e Botës 2026, duke duruar dhimbjet e shpinës. 30-vjeçari u shpall edhe lojtari më i mirë i turneut, një çmim që i shtohet Topit të Artë të fituar më parë.

Rodri mbetet një ndër lojtarët më me ndikim te Manchester City, me një kontratë që e mban të lidhur me klubin deri në vitin 2027. Pavarësisht kësaj, gjatë verës emri i tij është përfolur vazhdimisht për një transferim të mundshëm te Real Madridi, ndërsa interes kanë shprehur edhe Barcelona dhe Paris Saint-Germain.

Pas suksesit në Botëror dhe çmimeve individuale, spanjolli tashmë synon të rikuperohet plotësisht në mënyrë që të jetë gati për startin e sezonit të ri.