Robin Gosens mbron Granit Xhakën: Kapiteni është pika kyçe dhe udhëheqësi i Zvicrës

Robin Gosens, futbollisti i njohur gjerman, ka komentuar së fundmi raportimet mediatike që përfshijnë kapitenin e Zvicrës, Granit Xhaka, pas triumfit të helvetikëve ndaj Kanadasë.

Pas barazimit zhgënjyes 1-1 ndaj Katarit, gazeta gjermane Bild raportoi se klima në zhveshtoren zvicerane ishte bërë “toksike”, duke e lidhur këtë me mënyrën se si komunikon Xhaka, i cili shpesh shfaqet i drejtpërdrejtë në kritikat e tij edhe publikisht.

Megjithatë, Gosens i priti me habi këto pretendime dhe doli hapur në mbështetje të mesfushorit shqiptar.

“Si mund ta dinë ata që atmosfera është toksike? Nuk besoj se dikush ka informacione të brendshme nga zhveshtorja”.

“Këto janë gjithmonë tituj që tërheqin vëmendjen dhe natyrisht që njerëzit hidhen menjëherë mbi ta. Por unë nuk u kushtoj shumë rëndësi gjërave të tilla”, tha 31-vjeçari.

Ai theksoi se, në vend se të mbështetet te thashethemet e mediave, preferon të besojë informacionet që vijnë nga burime të drejtpërdrejta, sidomos nga shoku i tij i afërt dhe ish-bashkëlojtari te Atalanta, Remo Freuler.

Sipas Gosens, ajo që ka dëgjuar vazhdimisht nga Freuler është krejt ndryshe nga tabloja e paraqitur në media.

“Xhaka është jashtëzakonisht i rëndësishëm për një skuadër. Ai është lojtari tek i cili orientohen bashkëlojtarët dhe është gjithashtu ai që merr përgjegjësi dhe udhëheq ekipin”.

Sipas tij, deklaratat publike kritike të Xhakës kanë pasur më shumë synimin për të mbrojtur skuadrën, sesa për t’i shkaktuar dëm asaj.

Gosens pranoi po ashtu se kapiteni i Zvicrës nuk është nga ata persona që përdorin fjalë të zbutura. Ai zbuloi se ka biseduar edhe me Robert Andrich, i cili e njeh mirë Xhakën nga periudha e tyre e përbashkët te Bayer Leverkusen.

“Është e vërtetë që ai mund të jetë provokues, shumë i sinqertë dhe shumë i drejtpërdrejtë. Ndonjëherë kjo mund t’u pengojë disa njerëzve dhe këtë mund ta kuptoj”.

Për Gosens, ndikimi i Xhakës nuk kufizohet vetëm te mënyra si flet, por duket qartë edhe në lojë.

“Nuk bëhet fjalë vetëm për fjalë. Ai është lider në fushë dhe kjo shihet qartë. Ekipi orientohet sipas tij, ai e dirigjon skuadrën”.

Ai shtoi se, në çastet më të vështira të ndeshjeve, lojtarët e tjerë e kërkojnë natyrshëm drejtimin e Xhakës.

“Të gjithë e shikojnë atë kur duhet të dinë si të pozicionohen. Ai është zgjatimi i trajnerit në fushë dhe kjo është shumë e rëndësishme”, përfundoi ai.