Rikthehet epërsia e Madridit? Reali e nis Ligën e Kampionëve si klubi me vlerën më të lartë në botë

Real Madridi hyn në sezonin e ri të Ligës së Kampionëve duke mbajtur statusin e skuadrës më të vlefshme në Evropë, me një ekip që vlerësohet në total 1.69 miliardë dollarë.

Klubi madrilen zë vendin e parë në listën e skuadrave më të shtrenjta, përpara Manchester Cityt, vlera e të cilit arrin në 1.66 miliardë dollarë.

Paris Saint-Germaini pozicionohet i treti me 1.58 miliardë dollarë. Pesëshja e parë mbyllet nga Arsenali, me një vlerë prej 1.54 miliardë dollarësh, dhe Barcelona, me 1.46 miliardë dollarë.

Pragun e një miliard dollarëve e kapërcejnë edhe dy klube të tjera: Bayern Munich, që vlerësohet në 1.21 miliardë dollarë, dhe Liverpooli, me 1.19 miliardë dollarë.

Vlera e këtyre skuadrave konfirmon sërish forcën sportive dhe financiare të Real Madridit, edhe pse në futbollin evropian janë fuqizuar disa rivalë me burime të mëdha ekonomike.

Ndërkohë, pas tensioneve disavjeçare të shkaktuara nga projekti i Superligës Evropiane, madrilenët kanë nisur një etapë të re në marrëdhëniet e tyre me UEFA-n.

Raportet më të mira me institucionin drejtues të futbollit evropian shënojnë një kthesë të rëndësishme në krahasim me përplasjet e mëparshme.

Përveçse është klubi më i suksesshëm në historinë e Ligës së Kampionëve, Real Madridi vijon të ushtrojë ndikim të jashtëzakonshëm në futbollin evropian, si në planin sportiv, ashtu edhe në atë financiar.

Me skuadrën e vlerësuar në 1.69 miliardë dollarë, Reali e fillon aventurën e radhës në Evropë nga kreu i një tjetër klasifikimi prestigjioz.