Real Madridi vendos një standard të ri historik në Botërorin 2026

Edicioni i vitit 2026 i Kupës së Botës ka sjellë një moment historik për Real Madridin, i cili tashmë mban rekordin për numrin më të madh të golave të shënuar nga lojtarët e një klubi të vetëm gjatë një turneu.

Protagonistët kryesorë të kësaj arritjeje janë dyshja e jashtëzakonshme Kylian Mbappe dhe Jude Bellingham. Sulmuesi francez udhëheq listën e golashënuesve me tetë realizime në gjashtë ndeshje, duke shtuar edhe një gol në suksesin 2-0 të Francës kundër Marokut në çerekfinale.

Ndërkohë, mesfushori anglez ka hyrë në analet e futbollit si lojtari i parë pas Diego Maradonës në vitin 1986 që shënon dopieta në dy ndeshje radhazi të fazës me eliminim direkt. Ai realizoi dy gola në fitoren bindëse ndaj Norvegjisë.

Kontributi i të dyve në këtë Botëror arrin në 14 gola, por ata nuk janë të vetmit përfaqësues të klubit që kanë lënë gjurmë në këtë kompeticion.

Vinicius Junior kontribuoi me katër gola për Brazilin përpara se të eliminonin në raundin e 1/8-ave, ndërsa talenti turk Arda Guler gjeti rrugën e rrjetës një herë gjatë fazës së grupeve.

Falë këtyre paraqitjeve, futbollistët e Real Madridit kanë shënuar gjithsej 19 gola në turne, duke fiksuar një rekord të ri absolut. Me këtë shifër, madrilenët kaluan Bayern Munichun (2014), Honvedin (1954) dhe Paris Saint-Germainin (2022), të cilët së bashku mbanin rekordin e mëparshëm me nga 18 gola nga lojtarët e tyre.

Klubet me kontributin më të lartë në histori të Kupës së Botës:

Real Madrid – 2026 (19 gola deri tani)

Bayern Munich – 2014 (18 gola)

Honved – 1954 (18 gola)

PSG – 2022 (18 gola)

Stade de Reims – 1958 (17 gola)

Barcelona – 1994 (16 gola)

Ky rekord mund të zgjerohet edhe më shumë, pasi kanë mbetur për t’u luajtur gjysmëfinalet, finalja e vogël dhe sfida për trofeun.

Në aspektin individual, Mbappe po vazhdon të shkruajë histori edhe me fanellën e kombëtares franceze. Me 20 gola në Kupat e Botës, ai ndodhet vetëm një realizim larg Lionel Messit, i cili kryeson klasifikimin e të gjitha kohërave me 21 gola.

Sulmuesi, i cili ka tejkaluar një problem fizik, pritet të jetë në fushë që nga minuta e parë në gjysmëfinalen ndaj Spanjës. Pas mbylljes së Botërorit, ai do të udhëtojë për t’iu bashkuar Real Madridit në përgatitjet nën drejtimin e trajnerit Jose Mourinho.

Tekniku portugez ka shprehur së fundmi besim të plotë te ylli francez. “Për Kylian Mbappen mund të them vetëm se është një futbollist fenomenal dhe unë do të bëj gjithçka për ta ndihmuar të bëhet edhe më i fortë,” deklaroi Mourinho.