Raphinha në ndjekje të rekordit të Ronaldinhos te Barcelona

Paraqitjet e jashtëzakonshme të Raphinhas në nisjen e sezonit të ri me Barcelonën kanë rikthyer vëmendjen te braziliani, i cili po dëshmon se renditet mes futbollistëve më të mirë në botë.

Pas një sezoni të kaluar të shoqëruar nga dëmtimet, forma e 29-vjeçarit ishte vënë në pikëpyetje, pavarësisht statistikave të tij mbresëlënëse. Megjithatë, kapiteni i ri i Barcelonës u është përgjigjur kritikëve në mënyrën më bindëse të mundshme.

Nën drejtimin e Hansi Flick, Raphinha po aktivizohet në një rol të ri si qendërsulmues dhe kjo lëvizje i ka dhënë një tjetër dimension paraqitjeve të tij. Në të gjitha garat, ai ka realizuar 14 gola dhe ka dhënë tetë asistime.

Në La Liga, sulmuesi brazilian kryeson renditjen e golashënuesve me 12 rrjeta, pesë më shumë se Kylian Mbappe. Këto shifra e vendosin atë mes pretendentëve kryesorë për trofeun ‘Pichichi’ dhe Këpucën e Artë Evropiane.

Synimi i radhës për Raphinhas është rekordi i bashkëkombësit të tij legjendar, Ronaldinho, i cili ka shënuar 94 gola për Barcelonën. Me 89 rrjeta, ish-lojtari i Leeds United është vetëm pesë gola larg këtij kuoti.

Nëse arrin të kalojë shifrën e Ronaldinhos, Raphinha do të bëhet golashënuesi i katërt më i mirë brazilian në historinë e Barcelonës. Neymar dhe Evaristo ndajnë vendin e dytë me nga 105 gola, një objektiv që mund të afrohet nëse braziliani vazhdon ritmin aktual të shënimit.