Pse Uellsi e bën qëllimisht të çrregullt fotografinë e ekipit para çdo ndeshjeje

Prej më shumë se dhjetë vitesh, Kombëtarja e Uellsit mban një traditë të veçantë para ndeshjeve: lojtarët nuk pozicionohen në mënyrë të rregullt për fotografinë e ekipit.

Kjo mënyrë e pazakontë u vu sërish në dukje përpara sfidës së Ligës së Kombeve kundër Portugalisë. Futbollistët e drejtuar nga Craig Bellamy u rreshtuan në mënyrë të çrregullt para tifozëve në stadiumin “Estadio Jose Alvalade”.

Mes kapitenit Ben Davies dhe Jordan James u krijua një hapësirë e konsiderueshme. Ndërkohë, David Brooks imitoi një pozicionim të njohur të Ashley Cole, duke lënë një boshllëk tjetër të madh mes tij dhe Neco Williams.

Pas kësaj pamjeje që bie në sy qëndron një histori interesante. Gjithçka nisi në vitin 2016, kur Joe Ledley pranoi se lojtarët nuk dinin ta organizonin mirë fotografinë e skuadrës. Në vend që ta korrigjonin, ata zgjodhën ta kthenin rrëmujën në traditë.

Më pas erdhi një sukses i madh: Uellsi pati një paraqitje të shkëlqyer në Evropianin e vitit 2016 dhe arriti në gjysmëfinale. Fotografia e çrregullt filloi të konsiderohej si një ritual fatsjellës për ekipin.

“Thjesht menduam se mund ta linim njësoj. Nuk ushtrojmë. Flasim brenda grupit dhe vendosim se çfarë do të bëjmë. Ka qenë me fat për ne, ndaj nuk mendoj se do të kemi ndonjëherë një fotografi normale”, kishte thënë Ledley.

Që prej asaj kohe, uellsianët e kanë ruajtur zakonin dhe në disa raste janë vendosur në formacione edhe më të pazakonta.

Për Uellsin, fotografia e “prishur” nuk është rastësi, por një traditë që besohet se i sjell fat.