Pse askush nuk e ka transferuar ende?”, Arsenalit i sugjerohet Marcus Rashford pas dështimit për Vinicius Jr

Arsenali është këshilluar të rishikojë planet e tij në merkato dhe të shqyrtojë mundësinë e transferimit të Marcus Rashfordit, pasi nuk arriti të siguronte shërbimet e Vinicius Juniorit të Real Madridit.

Braziliani ka rinovuar kontratën me klubin madrilen deri në vitin 2032, ndërsa ish-kapiteni i Arsenalit, William Gallas, e konsideron Rashfordin një përforcim të përshtatshëm për repartin ofensiv të drejtuar nga Mikel Arteta.

“Marcus Rashford do të ishte padyshim një zgjedhje shumë e mirë për sulmin e Arsenalit. Besoj se ai pati një sezon të mirë dhe jam i bindur se disa klube do të përpiqen të përfitojnë nga rrethanat e krijuara. Nuk besoj se do të vazhdojë të qëndrojë te Manchester Unitedi”, u shpreh Gallas.

Ai shtoi: “Nuk e kuptoj pse ende nuk e ka marrë askush. Ndoshta arsyeja është se çmimi i tij është tepër i lartë”.

Pas përfundimit të huazimit te Barcelona, Rashfordi është kthyer në radhët e Manchester Unitedit, por vazhdimi i karrierës së tij në “Old Trafford” mbetet ende i pasigurt.

Sipas Gallas, qëndrimi i sulmuesit anglez për t’u larguar nga klubi është i dukshëm.

“Ai dëshiron të largohet nga Manchester Unitedi, përndryshe nuk do të ishte transferuar në huazim te Barcelona. Do të përpiqet të gjejë një mënyrë për t’u larguar dhe për të firmosur një kontratë afatgjatë me një tjetër klub britanik. Tashmë mbetet për t’u parë nëse Manchester Unitedi është i gatshëm ta shesë. Kjo është çështja kryesore dhe duhet të dimë përgjigjen”, deklaroi Gallas.

Raportohet se Manchester Unitedi kërkon rreth 40 milionë funte për kartonin e Rashfordit, një vlerë që mund ta kthejë atë në një objektiv real për Arsenalin.

Ndërkohë, trajneri i Barcelonës, Hansi Flick, ka folur me vlerësim të lartë për Rashfordin pas mbylljes së periudhës së tij të huazimit te klubi katalunas.

“Për Marcusin mund të them se më pëlqeu shumë të punoja me të. Kur një lojtar është i huazuar, jo gjithmonë është e qartë se çfarë po ndodh me të dhe për këtë arsye situata jonë nuk ishte e lehtë. Megjithatë, më pëlqeu shumë bashkëpunimi me të. Ai është një futbollist fantastik dhe një person fantastik”./