Prishtina e nis mbarë vitin, mposht Ballkanin në finale dhe fiton Superkupën e Kosovës

Prishtina e ka nisur me trofe vitin 2024, pasi ka fituar Superkupën e Kosovës në futboll.

Në finalen e madhe të zhvilluar në Antalya të Turqisë, kryeqytetasit kanë mposhtur Ballkanin me rezultat 2-1 në një ndeshje spektakolare.

Vetëm pas 10 minutave lojë ndeshja u zhbllokua me Prishtinën që kaloi e para në epërsi.

Qendërmbrojtësi Egzon Sinani gjuajti bukur brenda zonës dhe realizoi për epërsinë e Prishtinës 1-0.

Ballkani kishte iniciativën, por duke krijuar disa raste dhe pa arritur të dërgonte topin në portën e Kolajt.

Kësisoj 45 minutat e para të ndeshjes i takuan Prishtinës që shkuan në epërsi me epërsi minimale 1-0.

Pjesa e dytë nisi për mrekulli për skuadrën e Emmanuel Egbos, që vetëm pas 10 sekondave realizuan edhe golin e dytë.

Kreshnik Uka me një asistim fantastik për Leotrim Kryeziun i cili realizoi me kokë për 2-0.

Ballkani u hodh në sulm me të gjitha forcat dhe në minutën e 79-të realizuan gol me Krenar Dulajn i cili shënoi pas një harkimi fantastik nga Armend Thaqi për 2-1.

Suharekasit rrezikuan deri në fund, por pa arritur të barazonin rezultatin dhe kësisoj Prishtina fitoi me rezultat 2-1.

Për Prishtinën ky ishte trofeu i 30-të në histori nga mëvetësimi i futbollit kosovar në vitin 1991. Kryeqytetasit kanë fituar 11 tituj të kampionit, 8 Kupa të Republikës dhe 11 Superkupa. /Telegrafi/