Përmbysje e pabesueshme në “Olimpico”, Real Madridi mposht Romën

Real Madridi ka siguruar një fitore spektakolare ndaj Romës, duke përmbysur një disavantazh prej dy golash në minutat e fundit të ndeshjes.

“Los Blancos” treguan edhe një herë forcën e tyre në këtë kompeticion, pasi realizuan tri herë brenda shtatë minutash dhe e kthyen rezultatin nga 3-1 në 3-4.

Roma e kontrolloi më mirë fillimin e takimit dhe kaloi në avantazh në minutën e 20-të, kur Marten de Roon e dërgoi topin në rrjetë.

Avantazhi i vendasve zgjati vetëm pesë minuta. Kylian Mbappe realizoi një gol të jashtëzakonshëm në minutën e 25-të, duke vendosur baraspeshën.

Ekipi italian vijoi të ishte më kërkues edhe pas pushimit dhe në minutën e 51-të Donyell Malen, pas një devijimi, shënoi për ta rikthyer Romën në epërsi.

Malen ishte sërish protagonist gjashtë minuta më vonë, duke realizuar një tjetër gol të bukur dhe duke e çuar rezultatin në 3-1 në minutën e 57-të.

Trajneri Jose Mourinho ndryshoi rrjedhën e lojës me aktivizimin e Endrick dhe Carlos Espi. Në minutën e 84-t, Espi shfrytëzoi një top të kthyer për të ngushtuar diferencën.

Vetëm një minutë më pas, Endrick barazoi shifrat me kokë, pas harkimit të Arda Guler.

Goli i fitores për Real Madridin erdhi në fund të takimit. Antonio Rudiger realizoi në minutën e 90-të pas një tjetër asistimi të Guler.

Pas këtij triumfi, Reali shkon në gjashtë pikë, ndërsa Roma mbetet me një pikë.