Për mua ishte hakmarrje”, Tevez rrëfen arsyen e kalimit nga Man Utd te Man City

Carlos Tevez ka treguar arsyet që e shtynë të largohej nga Manchester United dhe të bashkohej me Manchester Cityn në vitin 2009.

Ish-sulmuesi argjentinas foli për këtë periudhë në podcastin e ish-bashkëlojtarit të tij, Rio Ferdinand. Gjatë rrëfimit, ai kujtoi marrëdhënien me Sir Alex Fergusonin dhe tha se transferimi te rivalët e Cityt ishte një formë hakmarrjeje.

Tevez shpjegoi se, përpara huazimit dyvjeçar, drejtuesit i kishin premtuar se kontrata do t’i blihej pas një viti, nëse ai do të paraqitej mirë.

“Fergie më tha: ‘Carlos, tani do ta paguaj kontratën tënde dhe ti do të qëndrosh në Mançester’. Ekipi u nis për fazën përgatitore dhe unë e mbaj mend shumë mirë atë bisedë. Ai më tha: ‘Do të paguaj për Berbatovin, por ti mos u shqetëso, do të të blej edhe ty dhe do ta zbatojmë kontratën tënde’”, tregoi ish-lojtari.

Sipas Tevezit, publiku nuk e ka kuptuar plotësisht se çfarë ka ndodhur mes tij dhe Fergusonit, sidomos në prapaskenë.

Ai deklaroi se Fergusonit iu deshën rreth gjashtë muaj për të ndryshuar qëndrim dhe se më pas nisi ta linte në stol, duke krijuar përshtypjen se po përpiqej t’ia ulte vlerën në treg.

“Kjo ishte ajo që më lëndoi më shumë. Në fillim ai më tha se do ta mbante fjalën, por nuk e bëri. Përkundrazi, nisi të më linte jashtë formacionit dhe unë mendova se po më shtynte mënjanë për të ulur vlerën time”, u shpreh Tevez.

Argjentinasi pranoi se largimi ishte veçanërisht i dhimbshëm, pasi ndihej sikur ia kishte kushtuar zemrën Manchester Unitedit, pa marrë të njëjtën përkushtim në këmbim.

“Ishte e vështirë, Rio, sepse ndjeva se ia kisha dhënë zemrën time Unitedit. Por nuk e përjetova të njëjtën ndjesi nga ana tjetër. Pasi fituam Ligën e Kampionëve dhe ligën, ata sollën një lojtar për të ulur çmimin tim. Unë vazhdova në të njëjtën mënyrë gjatë muajit të parë, por në muajin e dytë të vitit të dytë nuk doja të dija më asgjë”, rrëfeu ai.

Tevez tha se, megjithëse kishte kaluar një periudhë të shkëlqyer te United, transferimi te City ishte mënyra e tij për t’u kundërpërgjigjur. “City, për mua, ishte si një hakmarrje. Nuk mora mbrapsht atë që dhashë”, përfundoi ish-sulmuesi.