Pedri flet hapur për mundësinë që Julian Alvarez t’i bashkohet Barcelonës

Mesfushori i Barcelonës, Pedri, ka dhënë një koment të drejtpërdrejtë për Julian Alvarez, teksa zërat për një transferim të madh të sulmuesit të Atletico Madridit gjatë kësaj vere po marrin gjithnjë e më shumë vëmendje.

Debati rreth të ardhmes së argjentinasit është intensifikuar në këtë afat kalimtar, pasi ai ka bërë publikisht të ditur dëshirën për t’u larguar nga Metropolitano, duke e kthyer këtë çështje në një nga historitë më të përfolura të verës.

Kjo situatë nuk ka kaluar pa u vënë re as në kampin katalanas dhe Pedri ka vendosur të shprehet publikisht për mundësinë e një lëvizjeje të tillë.

Në një prononcim për Teledeporte, reprezentuesi spanjoll e bëri të qartë se e vlerëson shumë sulmuesin e Atletico Madridit.

“Julian si lojtar, më pëlqen shumë, dhe gjithmonë kam thënë se dua lojtarët më të mirë te Barcelona”, deklaroi Pedri.

Gjithsesi, 23-vjeçari theksoi se realizimi i kësaj lëvizjeje nuk është aspak i thjeshtë.

“Por shumë gjëra duhet të ndodhin që kjo të realizohet”, shtoi ai.

Pedri tentoi po ashtu të mos e ushqente më tej gjithë zhurmën që është krijuar rreth kësaj teme.

“Nuk dua të ndërhyj në çështjet e klubit apo të lojtarit. Nëse marrëveshja ndodh dhe realizohet, atëherë mirë se vjen”.

Ndërkohë, prapa skenave, drejtuesit e Barcelonës, mes tyre Deco dhe Joan Laporta, po mundohen të përballojnë një panoramë të vështirë financiare, ndërsa është duke u përgatitur një ofertë që kap vlerën e rreth 130 milionë eurove për Alvarez.

Argjentinasi konsiderohet objektivi kryesor për të marrë vendin e Robert Lewandowskit, i cili pritet të lërë një boshllëk të madh në repartin ofensiv të katalanasve pas përfundimit të kontratës së tij në ‘Camp Nou’.//