Pas kundërshtimeve dhe paralajmërimit për ankesë në FIFA, SHBA i jep lehtësim Iranit për hyrjen para ndeshjes

Kombëtarja e Iranit ka siguruar një lehtësim të rëndësishëm gjatë Kupës së Botës, pasi Departamenti i Sigurisë Kombëtare i Shteteve të Bashkuara ka vendosur që iranianët të lejohen të futen në vend dy ditë përpara ndeshjes së tyre të fundit në grup. Ky vendim erdhi pas ankesave të vazhdueshme lidhur me kushtet e udhëtimit.

Përballja e tretë në grup kundër Egjiptit do të zhvillohet më 26 qershor në Seattle dhe, ndonëse autoritetet amerikane kanë zbutur qëndrimin për hyrjen e ekipit, skuadra iraniane do të jetë sërish e detyruar të largohet menjëherë nga SHBA sapo të mbarojë ndeshja. Lajmi u konfirmua nga një zëdhënës i Departamentit të Sigurisë Kombëtare.

Irani, që e ka vendosur kampin bazë në Tijuana të Meksikës, kishte shprehur pakënaqësi për faktin se ishte detyruar të udhëtonte drejt SHBA-së vetëm një ditë para ndeshjeve dhe të kthehej menjëherë pas tyre.

Pas barazimit 0-0 ndaj Belgjikës, trajneri Amir Ghalenoei deklaroi se skuadra e tij po luante “në kushtet më të këqija të mundshme”. Ai theksoi se vështirësitë me vizat dhe koha e kufizuar për udhëtim kishin ndikuar negativisht në përgatitjet e ekipit për turneun.

Në ndeshjen e luajtur në Los Angeles, përfaqësuesja iraniane mbërriti të shtunën në mbrëmje, zbriti në fushë të dielën dhe u detyrua të rikthehej në Meksikë po atë natë. Federata iraniane kishte bërë të ditur se do të ankohej në FIFA, pasi kërkesa për të hyrë dy ditë më herët ishte refuzuar në fillim.

Javën e kaluar, Andrew Giuliani, drejtor ekzekutiv i grupit të punës për Kupën e Botës në Shtëpinë e Bardhë, i hodhi poshtë kritikat e ardhura nga Irani. Ai deklaroi se SHBA-ja kishte pajisur me viza të gjithë lojtarët dhe trajnerët e ekipit, me synimin për të garantuar barazi sportive. Po ashtu, ai pranoi se disa zyrtarë që shoqëronin skuadrën nuk i kishin marrë vizat.

Nga ana tjetër, sekretari amerikan i Sigurisë Kombëtare, Markwayne Mullin, bëri të ditur se një person me lidhje të drejtpërdrejta me Trupat e Gardës Revolucionare Islamike të Iranit kishte tentuar të hipte në fluturimin e ekipit nga Meksika drejt Los Angelesit për ndeshjen me Belgjikën.

Pjesëmarrja e Iranit në këtë Kupë Bote është shoqëruar nga tensione politike dhe shqetësime të shumta për sigurinë. Ndërkohë, në aspektin sportiv, përfaqësuesja aziatike po vazhdon garën për kualifikim pas barazimeve 2-2 me Zelandën e Re dhe 0-0 me Belgjikën.