Pas fitores ndaj Vllaznisë, Qatip Osmani: Ishte e rëndësishme të reagonim pas humbjes me Teutën

Laçi triumfoi 2-0 ndaj Vllaznisë në derbin verior, të zhvilluar për javën e katërt të “Abissnet Superiore”. Pas përfundimit të ndeshjes, trajneri i kurbinasve, Qatip Osmani, komentoi paraqitjen e skuadrës dhe suksesin e arritur.

Osmani theksoi se fitorja ishte veçanërisht e rëndësishme pas disfatës së marrë kundër Teutës. Sipas tij, gjatë gjithë javës ekipi ishte përgatitur me fokus te përballja me Vllazninë dhe, në pjesën më të madhe, lojtarët i zbatuan detyrat e kërkuara.

“Pas humbjes me Teutën, reagimi me një fitore ishte shumë i rëndësishëm. Përgjatë javës u përgatitëm për mënyrën e lojës së Vllaznisë dhe skuadra i përmbushi shumicën e detyrave. Meritojnë përgëzime për këtë”, u shpreh trajneri.

I pyetur nëse Laçi do ta vijojë këtë mënyrë paraqitjeje, Osmani tha se skuadra do të përpiqet të ruajë të njëjtin nivel. Ai sqaroi se ndryshimi i sistemit mund të bëhet i domosdoshëm për shkak të dëmtimeve ose arsyeve të tjera, ndërsa fitoren ndaj Vllaznisë ia atribuoi epërsisë taktiko-teknike.

“Sigurisht që do të përpiqemi të vazhdojmë kështu. Ndonjëherë sistemi duhet ndryshuar për shkak të dëmtimeve apo arsyeve të ndryshme. Sot ekipi fitoi në aspektin taktiko-teknik, pasi lojtarët ishin më të shpejtë dhe më të zotë në dyluftime. Do të vazhdojmë në këtë drejtim”, deklaroi Osmani.