Pas dy disfatave radhazi dhe thirrjeve për shkarkim, Ran Ben Shimon pret kthesën kundër Kosovës

Nën presionin e zërave që kërkojnë largimin e tij, përzgjedhësi i Izraelit, Ran Ben Shimon, pret një përgjigje nga skuadra në takimin me Kosovën. Ndeshja do të luhet të enjten në Debrecen të Hungarisë, pak ditë pasi izraelitët u mundën rëndë 3-0 nga Irlanda në Ligën e Kombeve.

Pas dy ndeshjeve të grupit, Izraeli nuk ka grumbulluar asnjë pikë, kurse Kosova ka tri pikë. Kjo e bën përballjen e së enjtes në Debrecen të rëndësishme për të dyja përfaqësueset.

Shimon e pranoi se paraqitja kundër Irlandës ishte shumë e dobët dhe u kërkoi falje tifozëve. Ai e cilësoi të turpshme mënyrën se si ekipi e nisi takimin, duke treguar se edhe vetë ishte ndier i turpëruar.

Përzgjedhësi pranoi mangësi edhe në përgatitjen e asaj sfide. Sipas tij, ndonëse kishin menduar se skuadra ishte përgatitur mirë për Irlandën, ajo që ndodhi në fushë tregoi se përgatitja nuk kishte qenë e duhur.

Megjithatë, ai beson se gjendja në grup mund të përmirësohet dhe kërkon që reagimi të vijë menjëherë. Kosovën e përmendi drejtpërdrejt si njërën prej dy mundësive që Izraeli ka për të korrigjuar gabimet.

Siç raporton mediumi izraelit “Sport5”, Shimon tha se skuadra e kishte sjellë vetë veten në këtë situatë dhe se tani duhej të tregonte burrëri për t’u përballur me gjithçka që thuhej për të. Ai i identifikoi fitoret ndaj Kosovës të enjten dhe ndaj Irlandës më pas si dy rastet për të ndrequr gabimet.

Milot Rashica ka qenë lojtari vendimtar i Kosovës në dy takimet e fundit me Izraelin.

Duke marrë përsipër përgjegjësinë për paraqitjen e skuadrës, Shimon u kërkoi lojtarëve të japin një përgjigje në sfidat e ardhshme, ndërkohë që vazhdon të përballet me thirrje për shkarkimin e tij.