Partizani kërkon të dominojë Tiranën në derbin e parë të kryeqytetit

Derbi i parë i kryeqytetit mes Partizanit dhe Tiranës do të luhet të dielën, në orën 18:30, në stadiumin “Air Albania”. Përballja është e vlefshme për javën e 6-të të Superiores, ndërsa pritës do të jenë të kuqtë.

Partizani ka nisur ta ndezë atmosferën e sfidës disa ditë përpara startit, përmes një postimi në rrjetet sociale. Në posterin e publikuar nga klubi shfaqen futbollistët e skuadrës, me vëmendjen të përqendruar te sulmuesit Sidibe, Toma dhe Human.

Ngjyra e kuqe mbizotëron në sfond, duke përcjellë edhe synimin e Partizanit për të lënë gjurmën e tij në kryeqytet. Të dyja skuadrat vijnë në këtë duel pas një forme jo të mirë, ndaj derbi mund t’u japë mundësinë për të reaguar dhe për të dalë nga kjo situatë.