Para nisjes së sezonit, magjistari i njohur ganez zbulon parashikimin për kampionin e Ligës Premier

Nana Kwaku Bonsam ka tërhequr vëmendje të madhe në rrjetet sociale me një deklaratë të pazakontë, në të cilën parashikon se Chelsea do të kurorëzohet kampion i Ligës Premier sezonin e ardhshëm.

“Chelsea do ta fitojë Ligën Premier. Ata do ta fitojnë atë”, është shprehur Bonsam, duke dhënë një parashikim të prerë për klubin londinez që kërkon të rikthehet në majën e futbollit anglez.

Nana Kwaku Bonsam është një prift tradicional afrikan nga Gana, i cili njihet për pretendimet e tij mbi parashikimin e ngjarjeve sportive dhe për deklaratat e shumta që lidhen me futbollin. Komentet e bëra për disa prej emrave më të mëdhenj të këtij sporti e kanë kthyer atë në një figurë kontroverse.

Ai mori famë ndërkombëtare në vitin 2014, pasi pretendoi se jo vetëm i kishte parashikuar, por edhe i kishte shkaktuar problemet fizike të Cristiano Ronaldos përpara Kupës së Botës. Në atë periudhë, Bonsam deklaronte se kishte “punuar” kundër yllit portugez, ndërkohë që Ronaldo vuante realisht nga shqetësime fizike para turneut.

Gjatë viteve të fundit, prifti ganez ka bërë deklarata të tjera edhe për futbollistë të njohur. Përpara përballjeve të rëndësishme ndërkombëtare, ai ka pretenduar se praktikat tradicionale i mundësojnë të ndikojë në paraqitjet e lojtarëve, çka ka nxitur interesin e mediave.

Këtë herë, vëmendja e Bonsam është zhvendosur te Chelsea, për të cilin ai parashikon sukses nën drejtimin e projektit të ri sportiv të klubit.

Pas ndryshimit të pronësisë, Chelsea ka kaluar nëpër një fazë rindërtimi, duke shpenzuar shumë për afrimin e lojtarëve të rinj dhe duke synuar të përfshihet sërish në luftën për trofe.

Blutë kanë ndërtuar një ekip të mbushur me talente dhe besojnë se janë në gjendje të rivalizojnë skuadrat kryesore në garën për titull.