Nunez zbulon para kohe kalimin e Araujos te Liverpooli

Darwin Nunez ka lënë të gjithë pa fjalë duke bërë të ditur vetë afrimin e Ronald Araujos te Liverpooli, teksa klubi ende s’kishte dhënë asnjë njoftim zyrtar.

Sulmuesi nga Uruguaji, që sezonin e shkuar u transferua nga “Anfield” drejt Al-Hilalit, përdori platformat sociale për t’i dhënë mirëseardhjen shokut të tij të kombëtares në skuadrën e mëparshme.

Dëgjohet se Liverpooli ka mbyllur marrëveshjen me Barcelonën për një huazim njëvjeçar të mbrojtësit, duke përfshirë edhe të drejtën e blerjes përfundimtare në verën e ardhshme për një shifër rreth 47 milionë funte.

Por, ndërkohë që “The Reds” nuk e kishin zyrtarizuar ende lëvizjen, Nunez mori iniciativën dhe e bëri vetë publikimin.

Ai postoi një imazh krah Araujos, duke i përcjellë një mesazh prekës që la të kuptohej qartë se qendërmbrojtësi do të vishte fanellën e Liverpoolit.

“Shpresoj të kesh sukses në këtë klub madhështor, mik. Jam tejet i gëzuar që do të ndjesh përkushtimin dhe ngrohtësinë e tifozëve të Liverpoolit. Janë njerëz të jashtëzakonshëm dhe do ta kuptosh vetë. Tashmë je edhe ti një ‘Red’. Edhe pse nga distanca, do të jem gjithmonë me ty. VAMO ARRIBA!”, shkroi ai.

Reagimi nga ana e mbështetësve të Liverpoolit ishte i menjëhershëm, duke vënë në dukje me shaka se Nunez e kishte dhënë lajmin e merkatos përpara vetë klubit.

Një fans komentoi me batutë: “Që Darwini ta prezantojë Araujon përpara deklaratave zyrtare apo gazetarëve është diçka epike. Të adhuroj, Darwin.”

Një tjetër tifoz u shpreh: “Nunez, do të mbetesh përherë në zemrat tona. Dikur ‘Red’, përgjithmonë ‘Red’.”

Ardhja e Araujos shihet si një goditje kyçe për prapavijën e Liverpoolit, sidomos pas lamtumirës së Ibrahima Konates, i cili u largua pa kosto për te Real Madridi.

Qendërmbrojtësi 27-vjeçar uruguaian u transferua te Barcelona në vitin 2018 nga Boston River, dhe gjatë aventurës së tij në Spanjë numëron 213 ndeshje, tri trofe të La Ligës dhe pesë kupa të tjera kombëtare.

Në planin personal, Araujo ka fituar vlerësime duke u përzgjedhur në formacionin ideal të kampionatit spanjoll në sezonet 2022 dhe 2024.